Яшәгез сез бәхет, шатлык белән

Яшәгез сез бәхет, шатлык белән
1 июльдә Арча станциясендә Күпер урамындагы 63нче яңа йортны ачу тантанасы булды. Бу чарада муниципаль район җитәкчесе Илшат Нуриев катнашты.
– Авария хәлендәге торактан күчү – республикада тормышка ашырылучы максатчан программаларның берсе. Аның буенча безнең районда тузган торакларда яшәүче күп гаиләләр яңа фатирлы булды. Шулай Президентыбыз халыкның тормыш-көнкүрешен яхшыр- туга зур игътибар бирә. Дус, тату, бәхетле яшәгез. Бу программада катнашуыгыз өчен рәхмәт. Дөрес, авыр, түлисе бар. Әмма бернинди авырлыклардан да курыкмаска кирәк, – диде ул һәм фатирлар хуҗалары Дамир Хәсәнов, Марсель Әбсәләмов, Ринат Мөфлихунов, Ольга Кузнецова, Гөлнара Мотыйгуллина, Анастасия Адамовага фатир ачкычлары, истәлек бүләкләре тапшырды.
Беркатлы, җыйнак кына, күңелгә ятышлы, матур алты фатирлы йорт. Икесе берәр, дүртесе икешәр бүлмәле. Иркен, якты, бөтен мөмкинлекләр тудырылган.
– Без иске, ярым җимерек баракны сүтеп, шул урында йорт салдык. Аларны чагыштырырлык та түгел. Фатирларыгыз игелекле булсын, рәхәтен күрегез, – диде шушы йортны төзегән “Арча КСМы” ширкәте җитәкчесе Рафаэль Муллагалиев.
– Мин Вокзал урамындагы баракта яши идем. 1949 елны төзелгән йорт. Без аны биш ел элек сатып алдык. Гаиләбез кечкенә түгел, хатыным Гөлназ белән ике ул үстерәбез. Безнең бәхеткә ничек бу программа килеп чыкты. Нинди яхшы фатирлы булдык. Рәхмәт респуб- лика, район җитәкчеләренә. Ә түләүгә килгәндә…Хәзер бушка нәрсә бар? Исән-сау эшләп торганда, көчтән килмәслек әйбер түгел, – ди ике бүлмәле фатир хуҗасы Дамир Хәсәнов.
– Мондый йортта, бөтен уңайлыклары булган фатирда яши башлавыма күңелем дә ышанмый. Карагыз, без нинди баракта, кеп-кечкенә бүлмәдә гомер иттек, – диде Ольга Кузнецова, каршы яктагы әле сүтелеп бетмәгән ярым җимерек агач бинага күрсәтеп. – Безне сөендергән өчен җитәкчеләргә, төзүчеләргә – барысына да зур рәхмәт.
Комсомол урамындагы 16нчы йорт хуҗалары өчен дә ул көнне зур тантана булды – ул ныклап төзекләндерелгәннән соң файдалануга тапшырылды. Әлеге бина безнең күз алдында салынды, күз алдында искерде, дисәк тә була. Вакыт үтү белән кеше генә түгел, йортлар да “картая” шул.
– Подъезд стеналары, идәннәре бик ямьсезләнгән, тышкы яктан да күзгә ятышсызга әйләнеп бара, түбәдән су ага, фатирда салкын иде. Без өченче катта яшибез, үз башыбыздан кичте, – ди Лилия Вәлиева. – Бик яхшы төзекләндерделәр, түшәмне җылыттылар, түбәсен яптылар, сайдинг белән тышладылар, подъездларын карадылар, тәрәзә кырыйларын матурладылар, ут чыбыкларын алыштырдылар. Без бик канәгать.
– Беренче чиратта Президентыбызга зур рәхмәт, – диде район җитәкчесе Илшат Нуриев. – Безнең иң зур байлыгыбыз – халык. Бар да аның өчен эшләнә. Тыштан йорт бик матур. Эчке якта җитешсезлекләр булса, әйтегез. Биш елга гарантия бирелә. Әмма, минемчә, Рамил Әхмәтгалиев җитәкләгән “Энергосервис” ширкәте төзүчеләре начар эшләмәс.
– Шушы йортта яшәүчеләр исеменнән җитәкчеләргә рәхмәтемне җиткерәм. Һәр гаиләгә бәхетле булып, озак итеп шушы фатирларда яшәргә язсын, – диде Вакыйф Харисов.
Соңыннан әлеге тантаналарда Арча мәдәният йорты үзешчәннәре чыгыш ясап, әлеге йортлар хуҗаларына яраткан җырларын бүләк итте.
Гөлсинә Зәкиева