Балаң кайда уйный

Балаң кайда уйный
– Безнең Западный урамындагы балалар мәйданчыгы бик начар хәлдә. Гомумән, Арчада балалар мәйданчыклары мәсьәләсе ничек хәл ителә? Шул турыда язсагыз иде, – дип шалтыраттылар редакциягә.
Редакциягә шалтыратучы хаклы булып чыкты: Западный урамындагы балалар мәйданчыгы бик хәрабә хәлдә. Шул тирәдә яшәүче Наилә ханым:
– Монда безнең күчеп килгәнгә 25 еллап бар, шул вакыттагы уен мәйданчыгы инде бу, – дип сөйләде. – Безнең балалар шунда уйнап үсте, инде хәзер үз балалары бар.
“Аксакаллы” мәйданчыкның урыны бик әйбәт. Иркен дә. Әмма инде тузган, ташландыкка әверелгән. Шунда уйнаучы малайлар: “Безгә футбол уйнарга капка кирәк, атынгычлар, ком булса, әйбәт булыр иде”, – дип шаулаштылар.
Бу турыда районның баш архитекторы Рөстәм Хәбибуллин белән сөйләштек.
– Беләбез без ул урынны, – диде ул. – Аңа да барып җитәчәкбез. Спорт мәйданчыклары республика программасы буенча эшләнә. Быел районда шундый 5 мәйданчык файдалануга тапшырылачак. Балаларның уен мәйданчыклары республика программасына кермәгән, быел аларның берсе “Эссен” кибете янындагы парк эченә эшләнәчәк, тагын берсе Арчаның шәрык өлешендәге мәчет янына төзелә.
– Быел Арчада 5 балалар мәйданчыгы эшләнәчәк, – дип сөйләде шәһәр башкарма комитеты җитәкчесе Рафил Исмәгыйлев. – Берсен, Южная урамындагысын, эшләп бетереп, шимбә көнне ачабыз, Комсомол урамында да эшне башладык.
Г. Камал урамында күп фатирлы 4а йорты янында “Нур” торак милекчеләр ширкәте рәисе Рузил Әхмәтханов электр кискеч белән печән чаба иде. Янәшәдә генә 6 ел элек урман хуҗалыгы бик матур итеп балалар мәйданчыгы эшләп куйды.
– Агач әкренләп чери, – ди Рузил Әхмәтханов. – Әнә, чергән атынгычларның агачларын өеп куйдым. Балаларга шуарга таучык кирәк.
10нчы балалар бакчасы каршындагы Вагыйзовлар урамындагы 4а йорты янында балалар мәйданчыгы шулай ук әти-әниләрнең, балаларның яраткан урыны. Төрле төсләр белән матур итеп эшләнгән. Утырып торыр- га эскәмиясе, урындыгы, шуарга таучыклары, үрмәләргә баскычлары бар. Урыны иркен. Шунда уйнаучы балалар: “Атынгычлар булсын иде, ком кирәк”, – дип тели. “Гөмбә” астындагы ком урынын эт эчәгесе урап алган.
– Арчада күп фатирлы йортлар янында 12 балалар мәйданчыгы бар, – дип сөйли “Идарәче компания” ширкәте җитәкчесе Фәрит Зәйнуллин.
– Ә ничә йорт бар?
–186 йорт. Һәр йорт янында мәйданчык булса, шәп булыр иде! Аның өчен акча да, җир дә кирәк шул.
Кайбер йортлар янында машина куяр өчен урын бар, мәйданчыклар эшләргә җир юк. Кайберләреннән туп-туры машина юлына чыгасың. Кая ул балалар мәйданчыгы?!
Татарстан Республикасы Президенты Рөстәм Миңнехановның үзенчәлекле программаларының берсе ял итү паркларын эшләүгә юнәлтелгән. Халыкны культуралы ял итәргә өйрәтәбез. Арчада да андый парк эшләнә. Төсле, матур, уңайлы мәйданчыкларда уйнап үскән бала паркларда да ял итә белер иде.
Румия Надршина