Күркәм гаилә — горурлык

Күркәм гаилә — горурлык
8 июльдә Арчада гаилә, мәхәббәт һәм тугрылык көне зурлап билгеләп үтелде. ЗАГС идарәсенең тантаналар залына районыбызның күркәм, үрнәк гаиләләре җыелды. Аларны котларга район башкарма комитеты җитәкчесе урынбасары Илнур Котдусов та килгән иде.
Әле яңа булса да (илебездә 2008 елдан билгеләп үтелә), бу көн бәйрәм рухында һәр җирдә билгеләп үтелә. Елдан–ел аны белүчеләр арта, хәтта туйларын шул көнгә билгеләүчеләр дә бихисап.
Гомер сукмакларын гомергә бергә дип кушып, вәгъдәләренә тугры булып калган гаиләләр яшь буын өчен үрнәк. Гаиләләр нык булса, дәүләтебез дә нык була. Районыбызда андый гаиләләр бик күп, шөкер. Район ЗАГС бүлеге тарафыннан ай саен диярлек гомерләренең түгәрәк даталарын билгеләп үтүче озак яшәгән парлар бәйрәмгә чакырыла. Бүгенге юбилярлар — Арчадан Фидания һәм Наил Йосыповлар, Яңа Иябаштан Клара һәм Рәшит Сибәгатуллиннар, Иске Чүриледән Глара һәм Юлдаш Шакировлар, Утар Атыдан Нурания һәм Илсум Садыйковлар, Разия һәм Рәфкать Закировлар, Апаздан Гөлнур һәм Марсель Минҗановлар ЗАГС бүлегенең Дан китабына кул куеп, үзләренең тугрылыгын тагын бер кат раслады.
Аларның һәрберсенең тарихы үзенчәлекле, ләкин нәтиҗәсе бер – бәхетле, үрнәк гаилә. Эш, мәшәкатьләр артта калган, балалар үсеп үз ояларын корган, әти–әниләрен хәзер оныклары сөю бәхете белән кинәндерә. Һәркемгә кайтып сыеныр өчен җылы почмак кирәк. Иң ышанычлы урыныбыз, безне көтеп торган, борчу–шатлыкларыбызны уртаклашып, җан тынычлыгы биргән җиребез – ул безнең туган йортыбыз. Гаилә никадәр тату булса, аның җылылыгы да шулкадәр көчле була. Тантанада катнашучы гаиләләр сикәлтәле тормыш юлларыннан атлаганда абынмыйча, бер–берсен аңлап, саф мәхәббәт дигән олы хисне саклап кала алган.
Юбилярларны котларга килгән авыл җирлекләре вәкилләре үзләрендә шундый күркәм гаиләләр булуы белән горурланса, балалары әти–әниләреннән алган яхшы тәрбия өчен аларга чиксез рәхмәтле булуын җиткерә.
Күркәм гаилә янәшә–тирәдәгеләр өчен дә җылылык чыганагы булып тора. Андыйларга тартылабыз, сокланабыз, үрнәк алырга омтылабыз.
– Бер–береңне хөрмәт итеп яшәсәң, мәхәббәт гомер буенча саклана, – ди Рәшит Сибәгатуллин яшьләргә киңәш итеп. 50 ел тату, тигез яшәү — һәр гаилә өчен зур бәхет. Моңа тагын шунысы да өстәлә: әти–әниләр өчен сагынып кайтыр балаларың, балалар өчен сине көтеп торган әти–әниең булу. Сибәгатуллиннарның еракта яшәүче киленнәре хак әйтә: “Читтә торсак та, белеп яшибез, еракта һәрвакыт безне көтеп торучы чаткы бар һәм без кай- чан гына булса да, шунда кайтып җылы таба алабыз”.
Розалия Зиннәтова

Тулы вариантын һәм фото–
видеоларны arskmedia.com сайтыннан карагыз