Сездә күпме түлиләр?

Сездә күпме түлиләр?
Узган шимбәдә ТР Хөкүмәт йортында Премьер–министр Илдар Халиков үткәргән киңәшмәдә ТР Премьер–министры урынбасары — авыл хуҗалыгы һәм азык–төлек министры Марат Әхмәтов шәхси ярдәмче хуҗалыкларда сыерлар саны кимүе турында борчылып сөйләде. Беренче яртыеллыкта сөтлебикәләр 6 мең башка азайган.
— Халыктагы терлекнең баш санын тагын да киметүгә юл куймау өчен быел республика бюджетыннан шактый акча бүлеп бирелә, — диде ул.
Аерым алганда, шәхси хуҗалыклардагы бер сыерга — 3 мең сум, бер ана кәҗәгә 1 мең сум исәбеннән акча биреләчәк.
Шулай ук шәхси ярдәмче хуҗалыкларга тана алу өчен бер башка 15 мең сум исәбеннән акча бирелә.
3 һәм аннан күбрәк сыер асраган шәхси хуҗалыкларга кечкенә фермалар төзү өчен 200әр мең сум акча биреләчәк. 1300дән артык кеше гариза язган инде.
Район авыл хуҗалыгы һәм азык–төлек идарәсенең финанс–икътисад бүлеге җитәкчесе Марат Абдуллин әйтүенчә, безнең районда әлеге мөмкинлектән файдалана алырлык (3 һәм аннан күбрәк сыер асраучы) 59 шәхси хуҗалык исәпләнә.
Шәхси хуҗалыклар сыер асрасын өчен республика җитәкчеләре әнә шулай кайгырта. Монда тагын бер җайга саласы, ныклы контрольгә аласы мөһим мәсьәлә бар. Бу – сөтне сатып алу бәясе. Министр сөйләгәндә экранга әлеге бәяләрне дә чыгардылар. Моңа кадәр иң түбән бәя Арча районында дип сөйләсәләр, бу юлы “Арча” ширкәте (Арча һәм Балтач сөт комбинатлары шуның карамагында) “түргә” менеп утырган — сөтнең литрына 17 сум 3 тиен (НДСтан башка) түлиләр икән! 2014 елга караганда 9 тиенгә арткан да әле.
Әлеге киңәшмәдән соң хуҗалык җитәкчеләре, авыл җирлекләре башлыклары, сөт җыючылар, сөт тапшыручылар белән сөйләштем. “Сөт өчен ничек әйбәт түлиләр икән бит!” — дим. Алар: “Экранга нәрсә чыгармаслар”, — дип елмаеп кына куйдылар. Безнең сөткә 11–12 сумнан артык түләгәннәре юк, диләр.
Шушы урында туктап, сыер асраучыларга, сөт җыючыларга әйтәсе сүзебез бар: әйдәгез июнь аенда сөт өчен кайда күпме түләгәннәре турында бергәләп мәгълүмат туплап алыйк. Редакциягә 3–11–58 номеры белән шалтыратыгыз яки язып җибәрегез. Әлеге мәсьәләне район җитәкчесе Илшат Нуриев та контрольдә тота.
Арча сөт комбинаты җитәкчелегенең фикере дә халык өчен кызыклы булыр иде, аларга да газета битләрендә урын бирергә әзербез.
Ильяс Сәхәпов