Ипи җаным, син бармыни

Ипи җаным, син бармыни
Печмәнтау авылыннан Гафифәбану Шакирҗановага 90 яшь тулды. “Мәрхәмәтлек” үзәге җитәкчесе Руфия Баһаветдинова, район социаль яклау бүлеге белгече Резедә Галиуллина юбилярны котлап, Россия Президенты В.Путинның Рәхмәт хатын тапшырды. Бүләкләр белән Ташкичү авыл җирлеге башлыгы Фәһим Фәйзуллин да килде.
Быел май аенда Печмәнтау авылында Бөек Ватан сугышында һәлак булганнар истәлегенә һәйкәл ачу тантанасында катнашырга туры килде. Авылда иң өлкән кеше Гафифәбану Шакирҗанова, диделәр анда. Кызганыч, ул тантанага килә алмады. Сөйләгәннәрен тыңлыйсы килгән иде.
Гафифәбану апа улы Галимулла, килене Зәбидә белән яши. Ялгыз булмавы белән бәхетле.
– Бик рәхәттә яши инде, – ди килене Зәбидә. – Мунча кертәбез, өс-башы чиста, тамагы тук.
Галимулла әнисенә бер генә бала.
– Әти 26 яшендә юл һәлакәтендә үлгән, – дип сөйли Галимулла. – Әтнәдә судья булып эшләгән. Әни башка кияүгә чыкмаган.
– Без үзебез 11 бала туганбыз, – дип искә төшерә Гафифәбану апа. – Бер-бер артлы үлеп барганнар. Шуннан әти белән әни корбан чалдырып, Коръән укытканнар. Өчебез исән-сау үскәнбез. Абый Салихҗан Казанда яшәде, олыгаеп үлде. Апа Нурлыбанат 92 яшьтә, исән-сау, Яңа Кырлайда яши.
Сугыш башланганны яхшы хәтерли.
– Ир-атлар атларны эшкә дип абзардан чыгара гына башлаганнар иде, чыгармый торыгыз, сугыш башланган, дип килеп әйттеләр, – дип сөйли Гафифәбану апа. – Иң башта 1920 елгы 12 ир-атны сугышка алдылар. Мин дә озата бардым. Кенәр юлыннан менеп киттеләр. Иң беренче булып авылдашыбыз Габделхакның үле хәбәре килде. Өч улы ятим калды. Зәкия апа Хәйретдинованың дүрт улы Нәҗметдин, Сәләх, Минһаҗетдин, Хәбир әрәм булдылар.
Гафифәбануны бригадирлар курсында укытып кайтаралар. Яшь кызга бригадир булып эшләве бик кыен була. Эшләргә ир-атлар юк. Бар өмет хатын-кызлар белән балаларда.
– Иң кыены кешенең абзарына кереп, карап торган сыерын эшкә җигеп алып чыгу иде, – ди Гафифәбану апа.
Казан пекарнясына утын әзерлиләр. Эшләгән өчен ипи бирәләр. Гафифәбану сөенеп өенә кайтып керә. Әнисе Мәрьямбану апа ипине кадерләп алып, әкрен генә күкрәгенә кыса да: “Ипи җаным, син бармыни соң әле?!” – дип елап җибәрә...
– Утыртырга бәрәңге әзерли идек, – дип сөйли Гафифәбану апа. – Сугыш бетте, дип килеп әйттеләр. Зур казан тутырып бәрәңге пешердек, фермадан сөт алып килеп, бәрәңге боламыгы әзерләдек. Әйдәгез, туйганчы ашагыз, сугыш беткән дия-дия сөенешеп, елашып, бер-беребезне сыйладык.
Гафифәбану апа ире Абдулла белән нибары өч кенә ел яшәп кала. Ялгызы бер ул тәрбияләп үстерә. Хәзер менә дүрт улыбыз бар (улының балалары), дип сөенә. Колхозда эшли, Яңа Кенәрдә фотографиядә, үзләрендә клубта җыештыручы булып хезмәт итә. Улы Галимулла игелекле, тәртипле бала булып чыга. 47 ел тракторда эшли. Хатын-кызның бәхете баласы, гаиләсендә шул.
Гафифәбану апаны олы юбилее белән котлыйбыз!
Румия Саттарова