Кармак сала балыкчы

Кармак сала балыкчы
Су буенда балыкчы. Иртәнге 5 тулганчы су буена балыкка төшеп утыручыларга һәм сәгатьләр буе калкавычка текәлеп утыручыларның сабырлыгына кемдер сокланып, кемдер сәер санап, ә кайберәүләр, бигрәк тә вакыты булмаучылар, кызыгып та куя.
Арчада ел саен балыкчылар бәйгесе уза. Моны фанат балыкчылар зарыгып көтеп ала. Һәрберсе үзен оста дип санаса да, бу юлы кемгә зуррак балык керер, кем өлгеррәк булыр икән дип кызыксына алар.
Быелгы ярышлар 11 июльдә узды. Район яшьләр эшләре һәм спорт бүлеге оештырган быелгы балык тоту ярышы Бөек Җиңүнең 70 еллыгына багышланды. Көннең менә явам–менә явам дип торучы болытлы булуына карамастан, Арчаның Нефтебаза буасы янына 29 балыкчы җыелган иде.
Берничә сәгать сизелми дә үтеп китте. Ниһаять, дулкынландыргыч мизгел – нәтиҗәләр ясалды.
1 урынны Казанбаштан Равил Нәҗмиев, 2 урынны Арчадан Марат Исмәгыйлев һәм 3 урынны шулай ук Арчадан Рамил Гәрәев яулады.
Быел балык тотучылар арасында нәфис затлар, кечкенә балыкчылар да бар иде. Алар номинацияләр буенча бүләкләнде: “Балыкчы туташ” Күпербаштан Алия Гафарова, “Яшь балыкчы” Арчадан 5 яшьлек Зөлфәт Заһидуллин, “Өлкән балыкчы” Арчадан 72 яшьлек Ренат Даутов.
Балыкчыларның кармаклары һәрвакыт чиртеп торсын, зур балыклар кармакны читләп узмасын, аулары уңышлы булсын.
Розалия Сафина