34 гаиләдә шатлык

34 гаиләдә шатлык
9 июльдә файдалануга тапшырылган 36 фатирлы йорт Арчаның Максим Горький урамында урнашкан. Өч подъездлы зур йортны “Арча МСОсы” ширкәте төзегән. Узган ел шушы вакытларда нигезе генә салынып ятучы йорт бүген инде хуҗаларын кабул итте.
Йортны тапшыру тантанасына ТР төзелеш, архитектура һәм торак-коммуналь хуҗалык министры урынбасары Марат Сәйфетдинов та кайткан иде. Яңа йортның бусагасын атлап керүче гаиләләргә имин, тыныч тормыш теләп район башкарма комитеты җитәкчесе Илшат Нуриев белән бергәләп хуҗаларга ачкычлар тапшырдылар. Район Мәдәният йортының үзешчәннәре җыр-моңнары белән бәйрәмгә ямь өстәде.
Йорттан бер фатир инвалид балага, дүртесе күп балалы гаиләләргә һәм калганнары тузган торак программасы буенча бирелде.
4 кешелек Макарушкиннар гаиләсенә фатир инвалид балалары өчен бирелгән. Ачкыч тапшыру тантанасына Казаннан Нурия апаның сеңлесе Раушания дә кайткан. “Ел ярым элек Русланга субсидия акчасы күчкән иде, бүген менә фатирлы да булдылар. Апалар гаиләсенә ярдәм кулы сузган һәркемгә зур рәхмәт”, — дип Нурия апаның шатлыгын уртаклашты ул. Нурия апа 23 ел тумыштан 1 төркем инвалид улы Русланны бага. Өстәвенә, ире Федор да авыру, аны да карарга кирәк. Фатирга гаиләләре белән бик куанганнар, инде яңа мебельләргә заказлар биргәннәр. “Монда үзебез яшәячәкбез, иске йортта төпчек улыбыз кала”, — ди Нурия апа.
Әлеге йорттан күп балалы гаиләләргә дә фатирлар бирелде. Иске Чүриледән Рәхимовлар, Айванннан Мусиннар алтышар бала үстерә. Икесе дә бер һәм икешәр бүлмәле фатирларга ия булды.
– Дәүләтнең күп балалы гаиләләргә карата мондый программаны тормышка ашыруына безнең кебек фатирларга ия булучылар рәхмәт укып туймыйдыр, – ди Айваннан Сәрия Мусина. – Барлык кешегә дә безнең кебек сөенергә язсын.
Балалар яратучы Мусиннар үзләре дә күп балалы гаиләдә үскән. Сәрия апа 5 балалы гаилә баласы булса, Мөслим абый 5 кыз арасында бердәнбер ир бала. Аллаһы Тәгалә үзләренә дә 5 малай арасында бер генә кыз насыйп иткән. “Күп баланы үстерергә, кеше итәргә Ходай ярдәм итә. Балаларны үстерешергә кайнанам бик булышты, аңа зур рәхмәт. Балаларны үстергәндә җиңел булмаса да, үскәч бик рәхәт икән. Төпчекләрне, берсенә 7, икенчесенә 6 яшь, өлкәннәре үсеп беткәч тапкангамы, яратып туймыйбыз”, – ди Сәрия апа.
– Нәрсә генә эшләсәк, төзесәк тә, халык өчен эшлибез, – ди Президентыбыз. Безнең район халкы дәүләт тарафыннан кабул ителгән төрле программаларның тормышка ашырылуы, халыкка шуннан файдалана алу мөмкинлеге тудырылу белән бәхетле. Халык өчен, халыкның тормыш-көнкүреш шартларын тагын да яхшырту өчен төзелгән программалар киләчәктә тагын да артсын иде.
Розалия Зиннәтова