Балалар бәхетенә

Балалар бәхетенә
Быел Арчада 4 яңа балалар бакчасы ачылачак.
Татарстанда үзенчәлекле 30 республика Президент программалары тормышка ашырыла. Шуларның берсе – “Балалар бакчалары төзү”. 6 июльдә Татарстан лидеры Рөстәм Миңнеханов Яр Чаллыда яңа балалар бакчасы ачты. Әлеге программа мәктәпкәчә балалар мәгариф учреждениеләренә чиратны бетерергә тиеш. Соңгы 5 елда Татарстанда республика бюджеты исәбенә 200дән артык мәктәпкәчә учреждение төзелде һәм төзекләндергәннән соң ачылды.Шуларның 118е — өр–яңалар.
— Арча районында “Балалар бакчалары төзү” программасы 2011 елда тормышка ашырыла башлады, — ди район башкарма комитетының инфраструктура үсеше бүлеге җитәкчесе Рөстәм Хәбибуллин. — Иң беренче булып шәһәрнең Шәрык микрорайонында 140 урынлы “Бәләкәч” балалар бакчасы сафка басты. Аны төзү өчен республика бюджетыннан 65 млн. сумнан артык акча бирелде.
Әлеге балалар бакчасын ачарга республика Президенты Рөстәм Миңнеханов үзе килде. Ул төзелеш сыйфатына югары бәя бирде. Дөрестән дә, шәһәребезне бизәп торучы иң матур биналарның берсе ул. Президент балалар бакчасы урнашкан Сибгатуллин урамына асфальт җәю өчен өстәмә акча бирде. Ата–аналар аңа бик рәхмәтле.
2014 елда әлеге программа кысаларында Арча шәһәренең көньяк өлешендә 260 урынлы “Шатлык” балалар бакчасы ачылу гаять зур вакыйга булды. Аның бәясе – 130,829 млн. сум. Шуның 4,3 млн. сумы — Татарстан Республикасы, 126,518 млн. сумы Россия Федерациясе бюджетыннан.
Әлеге балалар бакчасы үзе бер шәһәрчек кебек. Анда балаларга ял итү, тәрбия һәм белем алу өчен бөтен мөмкинлекләр тудырылган.
— 2015 елда Президентның бу программасы безнең районда географиясен киңәйтеп, авылларга да барып җитте, — дип дәвам итә Рөстәм Хәбибуллин. — Быел Үрнәк бистәсендә һәм Мөндеш авылында 50шәр урынлы балалар бакчалары төзелә. Аларның һәркайсына республика бюджетыннан 29 млн. 419 меңәр сум акча бирелде. Тапшыру срогы — 2015 елның августы.
Быел Арча шәһәрендә элекке 6нчы мәктәп бинасында 6 төркем һәм Арчаның 3нче гомумбелем мәктәбе базасында 2 төркемлек балалар бакчалары ачылачак. Әлеге төзелешләр өчен респуб- лика бюджетыннан 102 млн. сумнан артык акча бирелде.
Быел, югарыда әйтеп үтелгән объектлар сафка кергәннән соң, Арчада 3 яшьтән өлкәнрәк яшьтәге балаларны бакчага урнаштыру проблемасы тулысынча хәл ителәчәк.
Ильяс Фәттахов