БОРЧЫЛМАГЫЗ, МИН ИСӘН-САУ!

БОРЧЫЛМАГЫЗ, МИН ИСӘН-САУ!
Омск өлкәсе Светлый поселогында 12 июльдә кичен солдатлар казармасы урта бер җиреннән ишелеп төште. 337 кеше яшәгән дүрт катлы казарма һәлакәтендә 23 хәрби һәлак булды. Араларында яңа гына хәрби ант кабул итүчеләр дә бар. Һава-десантчылар гаскәрләренең хәрби частенда безнең районнан да 4 егет хезмәт итә.
Алар армиягә яңа алынып, хәрби ант кабул итәргә өлгермәгәннәр иде әле. Һөнәр алып, дәүләт имтиханнары тапшырып, дипломнар яклап, күңелле мәшәкатьләр белән йөрделәр. Аннан – армиягә!
Татарстан Республикасы хәрби комиссариатының Арча һәм Әтнә районнары буенча бүлек җитәкчесе Алмаз Борһановтан белештек, бәхеткә, егетләр исән-сау. Солдатларның якыннары белән дә элемтәгә кердек.
Мөрәледән Вилдан Абдуллин белән Рүзәл Җәләлиев икесе бер көнне 4 июльдә армиягә китәләр. Арча егетләре Камил Махиянов белән Ранил Нургалиев 30 июньдә хәрби хезмәткә алыналар. Дүртесе дә Омск өлкәсенә һава-десантчылар гаскәрләренә эләгә.
– Армиягә бары тик ВДВга гына барам, дип кырт кисте улыбыз Камил, – дип сөйли әнисе Раилә Махиянова. – ВДВ булмаса, миңа армия кирәк түгел, диде. Үз теләгенә иреште. Үрнәк агросәнәгать көллиятендә техник-механик белгечлеген алды. Үзе теләгән гаскәрләргә армия хезмәте үтәргә китте. Казарма ишелер алдыннан сөйләшкән генә идек. Ярар, мин йокларга киттем, дип саубуллашты гына, 1 сәгатьтән соң шушы хәл килеп чыкты. Әлеге коточкыч хәбәрне ишетүгә әтисе, кызлар белән тотындык еларга... 1 сәгатьтән соң Камил үзе шалтыратты. Мин исән-сау, бар да әйбәт, дип. Җимерелгән бинадан Камил яшәгән казарма 10 метр ераклыкта була. Безнең улыбыздан бер атна алдан килгәннәр алдагы көнне генә, 11 июльдә, хәрби ант кабул иткәннәр. Тантанага килгән әти-әниләренең кайберләре әле кайтып та китмәгән була. Безнекеләрне башка частька күчергәннәр.
Арча егете Ранил Нургалиевның абыйсы Рамил белән сөйләшәбез.
– Төнге сәгать 11 тулып киткән иде, энекәш “Абый, минем хәлләр әйбәт”, дип шалтыратты. Күрше казармада булган. Армиягә ветеринария институтын тәмамлап китте.
– Улыбыз Вилдан төзелеш институтын тәмамлады, – дип сөйли Мөрәледән Гөлнара Абдуллина. – 10 июльдә диплом алу тантанасы буласы иде, өлгерә алмады, армиягә алдылар. Аллага шөкер, безнекеләр исән-сау, әрәм булган егетләр, аларның әти-әниләре өчен кайгырабыз...
– Вилдан белән безнең Рүзәл дус булдылар, ике көн рәттән озату мәҗлесе оештырдылар, икесе бер көнне армиягә киттеләр, бер частька эләктеләр, – дип сөйли Мөрәледән Рәмзия Җәләлиева. – Ул кичне апайсы Интернетта утыра иде, шушы коточкыч хәбәрне күреп алды, гаиләбез белән бик борчылдык. Озак та үтмәде улыбыз Рүзәл үзе шалтыратты. Борчылмагыз, мин исән-сау, дип. Авыл хуҗалыгы академиясен тәмамлады. 23 июньдә диплом яклады. 4 июльдә китеп тә барды.
Исән-сау күрешергә язсын!
Румия Надршина