БАЛАЛАР ДА НӘФРӘТЛӘНӘ

БАЛАЛАР ДА НӘФРӘТЛӘНӘ
“ТРның иҗади яшьләр академиясе” җәмәгать оешмасы Татарстан Республикасының Яшьләр эшләре һәм спорт министрлыгы белән балаларның җәйге лагерьларында “Коррупциягә юк дип әйт!» дигән уен-квест үткәрә. Шундыйларның берсе “Сеҗе” мәктәбендә урнашкан балаларның “Шатлык” лагеренда оештырылды.
Татарстан Республикасы Президентының коррупциягә каршы көрәш сәясәте мәсьәләләре буенча Идарәсе Баш киңәшчесе Юрий Корнилов та кайтты. Аларны лагерь җитәкчесе Руслан Галәветдинов каршы алды.
Кунакларны көткәндә балалар белән сөйләштек. Казанның 137 мәктәбеннән Айгөл Сәмигуллина:
– Миңа бик ошый монда, – дип сөйләде. – Коллектив әйбәт, дус, тату. Вожатыйлар безнең белән иптәшләрчә мөнәсәбәттә. Көн дә уен, конкурс- лар.
Казанның 108 мәктәбеннән Айдар Вәлиев:
– Монда барлык кешеләр дә позитив, – ди. – Начар сүзләр әйтмиләр.
Эльвина Насыриева, Алинә Галимуллина, Эльвина Идрисова (өчесе дә Арчаның 1нче мәктәбеннән) лагерьдагы күңеллелекләрне сөйләделәр.
– Мондагы кызыклы чараларны сөйләп бетереп булмый, – диеште алар. – Иртәбез физик күнегүләрдән башлана. Тәмле ашаталар. Бер кызыклы чараны сөйләп үтик әле. Савытка лагерьда ял итүчеләрнең исемнәре язылган кәгазьләр салына. Шулар арасыннан күз йомып берсен сайлап аласың. Кәгазьгә язылган малайга яки кызга көне буе үзенә сиздермичә генә матур сюрпризлар күрсәтә башлыйсың. Я аның мендәр астына конфет куясың, я битеннән пәп итәсең, я матур сүзләр язылган сәлам хаты юллыйсың һ.б. Бу сер кич белән генә билгеле була. Кызыклы уен.
Балалар казанлыларны дәррәү кул чабып каршы алды. “ТРның иҗади яшьләр академиясе” җәмәгать оешмасы (студентлар) балаларга кызыклы уеннар алып кайткан иде. Кунаклар килгәнче үк балалардан коррупциянең нәрсә икәнен сораштык. Аптырап калмадылар, төрлесе төрлечә җавап бирде: коррупция ул начар нәрсә, нинди дә булса күрсәтелгән хезмәт өчен тиешсезгә акча бирү-алу, сиңа яхшылык эшлиләр, шуның өчен син аңа акча бирәсең, юк, мин акча алмас идем…
Балалар командаларга бүленеп, станцияләрне йөреп чыктылар. Дөрес итеп сорауларга җавап бирергә, коррупциягә бәйле вакыйганы яки күренешне сәхнәләштереп күрсәтергә, рәсем ясарга, шигырь, җыр иҗат итәргә кирәк иде. Афәрин, балалар, биремнәрне оста башкарып чыктылар. Рәсемнәрне дә эчтәлек-ле ясадылар, шигырь дә, жыр да чыгардылар, җырладылар да, сәхнә күренешен дә уйнадылар. Иң кызыгы шунда, балалар нәкъ тормыштагыча кылана. Табибларның, юл-транспорт инспекторларының, югары уку йортлары укытучыларының һ.б.ның ришвәт алуларын күрсәттеләр. Шаяру-көлү генә түгел, ришвәтчеләргә карата нәфрәт тә бар иде аларда. Бала нәфрәте... “Сез боларны каян беләсез?” – дип сорагач, “Кинофильмнардан!” – дип җавап бирделәр. Шулай гына булса икән.
Румия Надршина