ИСӘН–ИМИН ҖЫЯРГА ЯЗСЫН

ИСӘН–ИМИН ҖЫЯРГА ЯЗСЫН
Муниципаль район җитәкчесе Илшат Нуриев 21 июльдә “Курса МТСы” һәм “Ак барс” агрокомплексы” ширкәтләрендә булды. Ул басуларда игеннәрнең торышы, урып-җыюга әзерлекнең барышы, терлек азыгы әзерләү, республика программалары кысаларында алып барыла торган терлек тораклары, силос–сенаж траншеялары төзелеше белән кызыксынды.
Илшат Нуриев “Курса МТСы” ширкәтенең диңгездәй чайкалып утырган бодай, арпа, арыш басуларына карап: “Сөбханалла, күз тимәсен!” — диде. Борчак, солы да мул уңыш вәгъдә итә.
— Ындыр табакларын, чистарту, киптерү агрегатларын тулы әзерлеккә китереп куйдык, — диде хуҗалык җитәкчесе Рәүф Гыйлаҗетдинов. — Быел яңа “Акрос” комбайны алабыз.
Шушы көннәрдә генә механизаторларны җыеп сөйләшкәннәр, түләү тәртибен аңлатканнар. Узган ел бер комбайнчы үзе — 131 мең, ярдәмче улы 70 мең сум акча эшләгән. Быел да эш күп булачак аларга. Район авыл хуҗалыгы һәм азык–төлек идарәсе җитәкчесе Айдар Габбасов бер арыш бөртегенең авырлыгы гадәттә 1 грамм, ди. Ә “Курса МТСы” ширкәтенеке 1 грамм ярым дип исәпләделәр. Бу гектардан 60 центнер биологик уңыш дигән сүз.
“Курса МТСы” ширкәтендә көзге чәчү өчен дә җир әзер. “5 августта чәчә башлыйбыз”, — ди хуҗалык җитәкчесе.
Район җитәкчесе “Ак барс” агрокомплексы” ширкәте басуларындагы игеннәрнең торышына да югары бәя бирде. Хуҗалыкта урып–җыюга да ныклап әзерләнгәннәр, һәр эшкә җаваплылык белән карыйлар.
Ильяс Сәхәпов