Мәктәп сәнгать сөючеләрне көтә

Мәктәп сәнгать сөючеләрне көтә
50 еллык тарихы булган Арча балалар сәнгать мәктәбенең даны еракларга таралган, дисәм, ялгышмамдыр. Чөнки анда белем алучылар районара, республика гына түгел, Россиякүләм, хәтта халыкара бәйгеләрдә дә катнашып, җиңүләр яулый. Тәмамлап чыкканнар Татарстанның эстрада сәхнәсенә күтәрелә, танылган биючеләр, җырчылар, гармунчылар булып китә. Сәнгать мәктәбе укучылары чыгышыннан башка районда бер генә чара да үтми. “Ар–и–Эль”, “Глянец” бию төркемнәрен, “Энҗеләр”, “Гүзәлкәй” вокаль коллективларын, курайчылар, “Мирас” гармунчылар, баянчылар, “Балкашык” кашыкчылар, гитарачылар ансамбльләрен, тынлы оркестрны, хорны кем генә белми икән. Алар сәнгать мәктәбенең горурлыгы.
– Арча балалар сәнгать мәктәбе өстәмә белем бирү системасындагы заман таләпләренә җавап бирерлек белем бирү учреждениеләренең берсе. Һәр ел аны 100гә якын бала тәмамлый. Бүгенге көндә 877 укучы музыкаль белем ала, – ди җитәкчесе Гөлнара Сабирова. – Район мәктәпләрендә 15 филиалы эшли. Дәресләрне югары квалификацияле укытучылар алып бара. Балаларга сәнгать өлкәсендә белем алу, иҗади үсеш өчен барлык мөмкинлекләр бар. Быел мәктәбебездә ныклап төзекләндерү эшләре башланды. Ул тагын да зурайтылачак, зур чишенү бүлмәсе, заманча концерт залы булачак. Шулай ук яңа җиһазлар белән тулыландыру, музыкаль инструментлар алу да планлаштырыла. Димәк, сәнгать мәктәбе тагын да матурланачак.
Шул уңайдан районның талантлы һәм сәләтле балаларына игътибары, мәктәп бинасын ныклап төзекләндерүгә ярдәм итүе өчен балалар сәнгать мәктәбе коллективы, ата–аналар һәм укучылар исеменнән район житәкчесе Илшат Нуриевка рәхмәтебезне җиткерәбез.
Шулай ук биредә бер генә яңалыктан да читтә калмыйлар. 2013 елдан заманча технологияләр кулланып укыталар. Мәктәптә компьютер сыйныфы бар һәм анда музыкаль–теоретик фәннәр буенча дәресләр алып барыла. 2014 елдан фортепиано, кыллы инструментлар (скрипка), халык инструментлары (баян, домбра) буенча сәнгать өлкәсендә өстәмә һөнәр алды гомуми белем бирү программасы нигезендә укый башлаганнар. Ягъни, музыка уку йортларына укырга керергә теләүчеләргә өстәмә бер ел катлауландырылган программа буенча белем бирелә. Аңа алты яшь тә алты айдан тугыз яшькәчә балалар кабул ителә. Уку вакыты 8(9) ел. Кабул итү сынау- лары – музыкаль сәләт, ритм, музыкаль хәтер. 10 яшьтән 12 яшькәчә булган балаларга да борчылырга кирәкми, алар шушы программа нигезендә 5(6) ел дәвамында халык инструментлары (баян, домбра) буенча белем алачак. Кабул итү сынаулары шулай ук музыкаль сәләт, ритм, музыкаль хәтер.
Ә инде гомуми үсеш программасы нигезендә белем туплар өчен сәнгать мәктәбенә 6 яшь тә 6 айдан 12 яшькә кадәр булган балалар кабул ителә. Моңа музыка (синтезатор, гитара, балалайка, гармун, аккордеон, курай, вокал) – 3-5 ел дәвамында укыйсы (сынаулар – музыкаль сәләт, ритм, музыкаль хәтер), хореография – 5 ел белем аласы (сынаулар – физик мөмкинлекләр, ритм, музыкаль сәләт), театр сәнгате – 3 ел ярым укырга кирәк (сынаулар – китаптан өзекләр уку, җыр, бию) – бүлекләре керә. 10 яшьтән алып балалар 4 ел дәвамында сынлы сәнгать һәм нәфислек бүлегендә агачтан кисеп төрле әйберләр ясарга өйрәнә.
– Быел тагын яңалыклар була. Дөресрәге, әзерлек бүлеге иртә үсеш мәктәбенә әверелде. Яңа фән-логоритмика (баланы ритм һәм музыка аша үстерү) керәчәк. Анда балалар инглиз телен, музыкаль грамотаны, иҗат дәресләрен үзләштерәчәк, биергә өйрәнәчәк. Аңа 5 яшьтән алып 6 яшькәчә балалар кабул ителә. Шулай ук 7 яшьтән балалар өчен сынлы сәнгать һәм инглиз теле бүлеге эшләячәк. Бу да яңалык. Уку вакыты 4 ел. Моннан тыш, теләге булган 10–12 яшьлек балалар 3 ел дәвамында тынлы инструментларда уйнау серләрен дә үзләштерә алачак, – ди Гөлнара Сабирова. – Өлкәннәр өчен дә яңалыгыбыз бар. Быелдан башлап бездә көнчыгыш биюләре мәктәбе эшли башлаячак.