АЛАРНЫ ОНЫТМЫЙЛАР

АЛАРНЫ ОНЫТМЫЙЛАР
Әле кайчан гына Гөлира ханым икесен дә чәчәк кебек киендереп очрашуга килә иде. Сөбханалла, үзе чибәр, балалары матур, дип сокланып карый идек без аларга. Мәрхәмәтлек үзәгендә кабат очраштык.
Гаилә һәм балаларга социаль ярдәм бүлеге белгечләре балаларны тәрбиягә алган әти-әниләр, опекуннар, балигъ булмаганнар белән түгәрәк өстәл оештырды. Әлеге чарада район мәгариф идарәсе җитәкчесе урынбасары Миләүшә Шакирова, педиатр Алия Камаева катнашты. Миләүшә Ниязовна балаларның җәйге лагерьлары турында сөйләде. “Моның кадәр мәгълүматны каян белер идек әле”, – диеште әти-әниләр. Чыннан да, түгәрәк өстәл артында әти-әниләрне кызыксындырган мәсьәләләр күтәрелде. Табиб Алия Камаева йогышлы эчәк авыруларыннан саклану чаралары турында сөйләде. Социаль педагог Гүзәл Дәүләтбаева рәсемнәр ясатып тынычландырды, эчке халәтне белә алды. Психологлар Йолдыз Хәкимова һәм Миләүшә Шаесламова балигъ булмаганнар белән “Өй. Агач. Кеше.” проекты методикасы буенча эшләде. Әлеге тест аша психолог баланың үсеш дәрәҗәсен, эшчәнлеген, кешеләр белән мөнәсәбәтен, хәтта нинди һөнәргә якынрак булуын ачыклады.
Тынычлану, күңелне бушату бүлмәсендә физик һәм сулыш күнегүләре ясадылар. Барлык катнашучыларга да янгын куркынычсызлыгы буенча буклетлар, педагогик киңәшләр өләшенде.
Язманың башында әйтеп үткән Шәяхмәтовлар үзләренең ике балаларын үстереп, олы юлга чыгаргач, бу ике катлы зур өйдә үзебез генә нишләрбез дип, тәрбиягә бер ул белән кыз алдылар. Инде алар мәктәпнең урта сыйныфларында укый. “Улыбыз Сабада кадетлар мәктәбендә белем ала. Малайлар шук була шул алар, хәрби тәртип аларга файдага гына. Бу аларның киләчәге өчен, – дип сөйли Гөлира ханым. – Бүгенге очрашуга килгәч, райондагы җәйге лагерьлар турында белдем, улыбыз хәзер Сеҗедәге “Шатлык” лагеренда ял итә. Кызыбыз бик әйбәт укый, ике 4лесе генә чыкты”.
Арчада Яковлевлар гаиләсе тәрбиягә алган Карина да сөенә-сөенә төрле уеннарда катнашты. Аның да нәни вакытын хәтерлим әле. Узган ел балаларны тернәкләндерү үзәгендә Каринаның очкынланып торган күзләрен, куанып уеннарда катнашып йөрүен күргәч, сөбханалла, гаилә җылысыннан кыз тәмам үзгәргән, дип уйлап куйган идем. Әнисе Гөлнур ханым Яковлева:
– Әйе, үзгәрде ул, – дип сөйли. – Үткенләнде, шукланды. Бүгенге чараны да бик яратты. Мәрхәмәтлек үзәгенең безне җыеп торуы әйбәт. Бер-беребез белән очрашабыз, аралашабыз, кызыксындырган сорауларга җавап алабыз. Рәхмәт, безне онытмыйлар.
Шурадан күп балалы Һадиевлар гаиләсе дә бар иде. Зөлфия ханымның хәлләрен сорашам.
– Өй дә эш, эш тә өй бит инде безнең, – дип сөйләде Зөлфия ханым. – Күңелле булды. Улым да тагын кайчан киләбез, дип тора. Җыеп торсалар, без бик шат инде. Күпме яңалык ишеттек, мәгълүмат алдык.
...Таныш йөзләр. Алар безнең арабызда. Кеше баласын үз канаты астына алган гаиләләргә нинди генә җылы сүзләр әйтсәң дә, аз булыр сыман.
Румия Надршина