МАРАТ ЛОТФУЛЛИН КЕМ УЛ?

МАРАТ ЛОТФУЛЛИН КЕМ УЛ?
“Бердәм Россия” сәяси партиясенең җирле бүлекчәсе “Геройлар урамнары” проекты нигезендә игелекле эш башкара. Проектның максаты – геройларны искә алу, алар белән халыкны таныштыру, ватанпәрвәрлек рухында яшьләрне тәрбияләү. Арча станциясендәге яңа 9нчы балалар бакчасында (“Шатлык”) әти-әниләр, балалар белән үткәрелгән истәлекле урам бәйрәме шуның ачык мисалы.
Арча станциясендә мәчеттән өстәрәк Марат Лотфуллин урамы бар. Кем ул Марат Лотфуллин? Ни өчен урамны аның исеме белән атаганнар? Белгәннәр, Әфганстан сугышында һәлак булган егет, диләр. Очрашуга әнисе Илсөя апа да килгән иде. Аз сүзле ана улы турында әллә ни сөйли алмады.
– Бик сагынам, – диде. – Үзем генә яшим. Кызым үз гаиләсе белән көн итә. Улым башкалардан аерылып торган бала булмады, тыйнак, гади иде.
Марат турында күбрәк беләсе килә. Бергә уйнап үскән малайлар, сыйныфташлар, сыйныф җитәкчесе – кемнәр алар? Сыйныф җитәкчесе – абруйлы математика укытучысы Татьяна Александровна Егорова. Яңа гына Сочидан кайтып төшкән иде. Укучысы турында:
– Маратны ничек хәтерләмим инде, билгеле, хәтерлим, – дип сөйләде. – 4кә, 5кә генә укыды. Тыйнак, тырыш, сүз тыңлаучан бала иде. 1985 елда мәктәпне тәмамлады. Үз тырышлыгы белән Казан төзүчеләр институтына укырга керде. Быел менә мәктәпне тәмамлауларына 30 ел була. Юбилей елы. Сыйныфташы Рамил Гыйния- тов белән кара-каршы гына яшәделәр, дус булдылар. Фото, видеоларга төшерүче Ринат Минһаҗев та аның сыйныфташы. “Арча нефть продуктлары” җәмгыяте ашханәсендә эшләүче Розалия, “Казан аптекасы”нда хезмәт итүче Сәрия, газчы Эдуард Газизов – алар бар да бергә укыды.
Ринат Минһаҗевны да эзләп таптык.
– Марат Тукай урамында яшәде, мин – Азин урамында, – дип сөйләде Ринат. – Уртача гына буйлы малай иде. Йөрешә идек.
– Безнең сыйныф дус, тату булды, – дип сөйләде Розалия Мәгъсумова (Хөрмәтуллина). – Барысы да күз алдында. Марат акыллы малай иде. Гаиләләре дә шундый тыйнак аларның. Армиядә бер ел хезмәт итте дә, юкка да чыкты. Каберенә дә барып йөрдек әле без аның. Бүген без Марат Лотфуллин урамында йорт төзибез. Сыйныфташыбыз Фирдания Каюмова да шушы урамда яши.
– Танклары ватылып, шуны рәтләгән вакытта иптәшләрен дошманнар һөҗүменнән саклаганда һәлак булган, – дип сөйли әнисе Илсөя апа. – Бөтен җире исән-сау иде, чигәдә, азрак муенда иде ярасы. Бала онытылмый икән ул бер дә... Бик сагынам. Акыллы бала булды, әтисе дә шундый иде. Армиягә институтның 1 курсыннан соң китте. Ульяновскидан беренче хаты килде. Сөенеп язган иде. Ярты ел өйрәнүләрдән соң төнлә Әфганстанга алып кереп киткәннәр. Армиядә бер ел дигәндә бетте бала...
“Бердәм Россия” сәяси партия- се җирле бүлекчәсе башкарма комитеты җитәкчесе Тәлгать Җәләлетдинов Илсөя апаның иңнәренә ак шәл салды. Бакча мөдире Надия Мифтахетдинова анага чәчәкләр бүләк итте. Педагог Гөлнара Гәрәева “Су буеннан әнкәй кайтып килә...” җырын бик матур итеп башкарды. “Бердәм Россия” партиясе җирле бүлекчәсе башкарма комитеты җитәкчесе урынбасары Валентина Гаранина, Арча станциясендәге мәдәни-спорт үзәгенең сәнгать җитәкчесе Илмира Фазылҗанова герой турында сөйләде, китапханәче Любовь Капралова балаларны уйнатып та алды. Соңыннан бергәләп фотога төштеләр. Надия Равилевна кунакларны балалар бакчасы белән таныштырды, чәй өстәле янында сөйләшеп утырдылар. Исән булса, бу бакчага Маратның оныклары йөргән булыр иде.
Румия Надршина