КЫЗУ КӨННӘР ҖИТӘ

КЫЗУ КӨННӘР ҖИТӘ
Басуларда игеннәр өлгереп килә. Бүген-иртәгә уракка төшәбез, дип торган хуҗалыклар да бар инде.
23 июльдә “Арча” ширкәтендә комбайннарның әзерлеген соңгы тапкыр карап чыктылар. Сигез “Акрос”, бер “Нива” комбайны — ширкәтнең бөтен өмете шуларда. Җәймә өстенә бастырып һәрберсен эшләтеп, суктырып карадылар. Бер бөртек коелмаганнары да бар.
— Хәйдәр Хәсәнов ел саен әйдәп бара торган комбайнчыбыз, — ди хезмәтне саклау буенча инженер Самат Заһидуллин. — Азат Фәттахов булмаса бер комбайныбыз да эшли алмый, берәр комбайн туктап калса, аны чакырабыз, хәзер сәбәбен табып көйләп бирә.
Комбайнчылар кыр кораб- ларын үзләре ремонтлаган. Аларның бу хезмәтләрен дә исәпкә алып, кабул итү вакытында уракта катнашырга әзер дигән бәя бирелсә — экипажга 25 мең сум премия!
Комбайнарның әзерлеген карарга район җитәкчесе Илшат Нуриев та килде.
— Сезнең алда бик җаваплы бурыч тора, — диде ул. — Зур хезмәт куеп үстерелгән игеннәрне югалтуларсыз җыеп аласы бар. Район буенча 55 мең гектардагы игеннәрне җыеп алырга кирәк. Бу көннәрдә булган хуҗалыкларда игеннәрнең торышы бик яхшы.
Икенче икмәк дип йөртелгән бәрәңге дә бар әле безнең. Бу культура ни хәлдә?
Бәрәңгенең быел сирәк тишелүе турында язган идек инде. Андый участок- ларга кабат утырткан кешеләр оттырмады. Без үзебез, мәсәлән, буш урыннарга июнь уртасында утыртып чыккан идек, хәзер алар 12–13 майда утыртканнарны куып җитте.
— Бәрәңге — көньяк культурасы, ул җылы ярата, — ди Россия авыл хуҗалыгы үзәге бүлеге җитәкчесе Рүзәл Мортазин.
Бәрәңге уңышы начар булмас кебек, әмма сак-лау чаралары күрергә киңәш итә тәҗрибәле белгеч. Мәсәлән, фитофторозга каршы эшкәртергә. Алырга ике атна кала сабагын чабарга.
— Элек бәрәңгене сентябрь ахырында гына алалар иде...
— Моның үз сәбәпләре бар иде. Колхоз бәрәңгесе бетмичә шәхси хуҗалыкларга алырга рөхсәт итмәделәр. Аннан, ул вакыттагы “Лорх” сорты өлгерсен өчен 120 көн кирәк булса, хәзерге сортлар 70–80 көндә өлгерә. Шуңа күрә август аенда бәрәңге алганга аптырыйсы юк. Билгеле, июньдә утыртучыларга соңрак алырга туры киләчәк.
Ильяс Фәттахов