АРЧАДА ЙОРТЛАР КҮП ТӨЗЕЛӘ

АРЧАДА ЙОРТЛАР КҮП ТӨЗЕЛӘ
Районда яшь гаиләләр, социаль ипотека, ятим балалар өчен торак төзү буенча Татарстан Республикасы Президенты программалары уңышлы тормышка ашырыла. Күз алдыбызда Арча яңара.
– Арча төбәкара вәкиллегенә кергән алты район арасында Арча районы йортны иң күп төзүче, – дип сөйли Татарстан Рес- публикасы Президенты каршындагы дәүләт торак фонды Арча төбәкара вәкиллеге җитәкчесе Ленар Закиров.
– 2005 елдан социаль ипотека программасы эшли башлагач, 1602 гаилә килешү төзеде, – дип сөйли район башкарма комитетының инфраструктура үсеше бүлеге җитәкчесе Рөстәм Хәбибуллин. – 68 йорт төзелде, 1058 гаилә фатир алды. “Яшь гаиләләрне торак белән тәэмин итү” программасы нигезендә 52 яшь гаилә фатирлы булды. Ятим балаларны торак белән тәэмин итү мәсьәләсенә дә зур игътибар бирелә. 32 ятим балага фатир бирелде. Быел 33 йорт төзелә, 11е файдалануга тапшырылды инде.
Соңгы 5 елны алсак, районда социаль ипотека программасы буенча күп фатирлы 57 йорт төзелгән, 901 гаилә фатир алган. 21 яшь гаиләгә һәм 20 ятим балага фатир бирелгән.
Элек иске бараклары белән истә калган Арчаның Зәйнуллин урамын танымыйсың хәзер. Бер-бер артлы өр-яңа йортлар тезелеп киткән. Киң урам, асфальт, балалар мәйданчыклары. Зәйнуллин урамының 13а йортында без. 12 фатирлы өч катлы йортның яртысын ятим балаларга биргәннәр, яртысын социаль ипотека буенча тапшырганнар.
– Безнең урамда, үзегез күрәсез, яңа йортлар күп, – дип сөйли шушы йортта яшәүче Рәмзия Гарифуллина. – Иң күп балалы йорт безнеке. Барысы 13 бала, Алла боерса, туасылар белән 15 буласы. Безнең урамда күңелле.
Йортның баскычыннан күтәрелүгә бала коляскаларының, велосипедларның күплегенә игътибар иткән идем. Декрет ялында утыручылар да байтак. Рәмзия белән Рәдиф Гарифуллиннар ике бүлмәле фатирны социаль ипотекага алганнар.
– Чиратта озак тормадык, – дип сөйли Рәмзия ханым. – Фатир ачкычын 2012 елның 29 июнендә тантаналы шартларда тапшырдылар. Күңелле булды.
Кухнялары иркен. Хәтта ике тәрәзәле. Шундый ук ике бүлмәле фатирда Лилия белән Рамил Сәләхиевлар яши.
– Үзем Арча педагогика көллиятендә укытам, – дип сөйли Лилия ханым. – Бюджет системасында эшләгәнлектән, социаль ипотекага фатир алдык. Бүлмәләр иркен, якты, без канәгать.
Әлеге йортка килеп керүгә иң башта Илсөяр белән Рифкать Хәмидуллиннарның ишеген шакыган идек. Өйдәләр иде.
– Әти дә, әни дә исән түгелләр, – дип сөйләде Илсөяр. – Абый белән икебезне Шушмабашта әби (Габидә Гарифуллина) тәрбияләде. Ятимнәр буларак, икебезгә дә шушы йорттан берәр бүлмәле фатир бирделәр. Кияүгә чыктым. Улыбыз Ринат 2011 елның 25 ноябрендә туды. Туып берничә генә көн үтте, фатир бирәчәкләре турында сөенечле хәбәр алдык. Менә бүген өченчесен көтәбез. Торак белән тәэмин итү программалары бетмәсен генә инде. Без дә шул теләктә.
Румия Надршина