ТИМЕРХАН БОРҺАНОВНЫ ИСКӘ АЛДЫЛАР

ТИМЕРХАН БОРҺАНОВНЫ ИСКӘ АЛДЫЛАР
“Бердәм Россия” сәяси партиясенең җирле бүлекчәсе “Геройлар урамнары” проекты нигезендә Арчаның Борһанов урамында истәлекле бәйрәм үткәрде.
Бәйрәмгә Арча районында 15 ел район башкарма комитеты рәисе булып эшләгән Тимерхан Борһановның тормыш иптәше Асия ханым һәм улы Татарстан Республикасы Дәүләт Советы депутаты Рафис Борһанов кайтты. Хәтер бәйрәмендә район башкарма комитеты җитәкчесе Илшат Нуриев катнашты. Исән булса, Тимерхан Борһановка 11 июльдә 90 яшь тулган булыр иде.
Бәйрәмдә халык күп иде. Ак яулыкларын бөркәнгән апа-әбиләр дә, чәчләренә ак бәс кунган агалар да чордашларын искә алырга җыелды. Сөбханалла, гади хезмәт юлы үткән Тәгъзимә белән Үзбәк Хәкимовлар парлап килгәннәр, заманында Асия ханым (шәфкать туташы) белән эшләгән табиблар Венера Һадиевна, Рәисә Гыйләҗиевна да биредә иде. Бар да таныш йөзләр...
Район үзәк китапханәсе хезмәткәрләре Тимерхан Борһанов турындагы китаплар белән күргәзмә әзерләгән иде. Бәйрәмгә килүчеләр сәяхәтне шушыннан башладылар. Аннан соң алар балаларның сәламләве белән аллы-гөлле чәчәкле мәйданга үттеләр. Түгәрәкләнеп утырып, эчтәлекле сәхнә күренешләре, концерт карадылар. Мәктәп укучылары Тимерхан Борһановның бала вакытларын, яшьлек елларын уйнап күрсәттеләр. Эх, ул чабаталы бала вакытлар. 11 яшьтән ятим калулар, үги әни белән яшәүләр, кичләрен сукыр лампа яктысында Тукайның ятимлеге турында елый-елый укулар, ат җигеп, инештән су, урманнан утын ташулар, хисапчылар курсларын тәмамлап, 16 яшьтән колхозда баш хисапчы булып эшләүләр, өздереп гармун уйнарга өйрәнүләр, спектакль-концертларда катнашулар – болар бар да яшьлек елларындагы кичереш- ләр.
Тимерхан Борһанов сугышта катнаша, аннан исән-сау кайтып, ТАССРның Югары Советы депутаты дәрәҗәсенә кадәр күтәрелеп, җаваплы эшләр башкара. 1963–1978 елларда Арча районы башкарма комитеты рәисе булып
эшли.
Хәтер бәйрәмендә Тимерхан Борһановны җитәкче һәм кеше буларак яхшы белгән Надежда Калуева, Илдус Сәгъдиев истәлекләре белән уртаклашты.
– Минем хәтеремдә ул киң күңелле, югары культуралы, тирән белемле кеше булып саклана, – дип сөйли ике ел район башкарма комитеты рәисе урынбасары булып эшләгән Надежда Калуева.
– Тимерхан Борһановичның тышкы кыяфәте, төс-битендә ниндидер кешеләрне үзенә тарта торган ягымлылык, эчке җылылык, чын күңелдән сөйләштерә торган сыйфаты бар иде, – дип искә ала Илдус Сәгъдиев.
Илшат Нуриев районның хәзерге уңышлары белән таныштырды, Асия ханымга чәчәкләр бүләк итте. Рафис Борһанов Арчаның көннән көн матурлана баруы, үзгәрешләр турында сөйләде. “Президент белән бергә” җәмәгать хәрәкәте яшьләре үзләренең эшләре, районда барган матур күренешләрне тасвирлап күрсәтте. Җыр- биюләр белән бик матур үтте бәйрәм.
Соңыннан урам бәйрәмендә катнашучылар белән сөйләштем.
– Без Тимерхан Борһановлар белән гаилә дуслары идек, әле дә аралашып торабыз, – дип уй-фикерләре белән уртаклашты ветеран табибә Венера Әхмәрова. – Тимерхан Борһанович хөкүмәт кешесе булды. Гаиләдә таякның авыр башы Асиягә төште. Асия бик булган хатын. Аларның гаиләсендә балаларга эш бүленгән иде. Хафиз, Әнисә, Рафис һәркайсы үз эшен башкарды. Рафиска көндәлек матбугатны күзәтеп барырга кушылган иде, әтисе эштән кайткач, әтисен кызыксындырган темалар турында сөйләшер, хәтта бәхәсләшерләр дә иде. Тимерхан Борһанович эшләгән елларда төзелешләр бик күп булды. Үзем медицина өлкәсендә эшләгәч, яхшы хәтерлим, хастаханәне киңәйттеләр, иске полик- линика урынына санэпидемстанция, авылларда участок хастаханәләре, фельдшер-акушерлык пунктлары төзеделәр. Болар бар да халык өчен бит!
– Минем әти Салих бик рәхмәтле иде аңа, – дип сөйли Арчада яшәүче Римма Сабирова. – Әтие- без сугыш елларында кышын трактор ремонтлаганда карда ятып үпкәсенә салкын тидереп, гарип калган кеше. Бик оста гармун уйный иде. Үзе бик оста итеп гармуннар да ясады. Үзешчән сәнгатьтә катнашырга бик яратты. Мәскәүгә фестивальгә кадәр барды. Тимерхан Борһанович, әтиебезне күреп алып, өйгә кадәр килде. Аның хезмәтен, сәләтен бәяләде. Атказанган мәдәният хезмәткәре исеменә кадәр бирдерде. Шул вакыт гади хезмәт кешесе әтиебезнең бик күңеле булган иде. Хәзер мәрхүм инде. Гаиләбез белән без аңа рәхмәтле.
Асия апаның да хәлләрен белештек.
– Бәйрәм миңа бик ошады, ничек оештырганнар аны?! – диде ул тәэсирләнеп. – Рәхмәт оештыручыларга. Улым Рафис та бик канәгать, “Афәрин!” диде. Бөтен республикага бер кеше ул безнең Тимерхан! Халык өчен эшләде.
Румия Надршина