УРАК ӨСТЕ ҖИТТЕ

УРАК ӨСТЕ ҖИТТЕ
Районда яңа урак өстен “Татарстан” һәм “Арча” ширкәтләре башлап җибәрде. “Татарстан” ширкәте комбайнчысы Фәнил Зыятдинов белән “Арча” ширкәтеннән Азат Фәттахов иң беренче булып урып-җыюга керешкәннәре өчен район җитәкчесенең махсус бүләкләренә лаек булдылар.
— Иң мөһиме — вакытның кадерен белеп, югалтуларга юл куймаска инде, — диде муниципаль район җитәкчесе Илшат Нуриев “Татарстан” ширкәтендә булганда. — Әйбәт уңыш үстергәнсез, исән–имин җыйнап алыр-га язсын!
Иске Чүриле авылы янындагы басуның гектарыннан уртача 40 центнердан ким чыкмас, дип исәплиләр. Дөрес, төрле басулар бар, әмма уңыш белән хәлләр начар түгел.
— Арыш урагына һәр хуҗалыкта керешергә вакыт, — ди район авыл хуҗалыгы һәм азык–төлек идарәсе җитәкчесе Айдар Габбасов. — Бүгенге көнне яңгырлар башланса, сагынып искә алырга калмасын.
Быел “Татарстан”, “Аю” ширкәтләре ашлык эшкәртү линияләрен яңарттылар. “Мәрҗани” ширкәтендә бу юнәлештә боз кузгалды. “Курса МТСы”, “Ак барс” агрокомплексы” ширкәтләре исә бу яктан тыныч. “Игенче” ширкәтенең сәгатенә 60 тонна ашлык киптерә торган агрегаты бар.
ТР Авыл хуҗалыгы һәм азык–төлек министрлыгы үзләренең ындыр табак- лары булмаган хуҗалык- ларга ашлыкны элеваторга китереп эшкәртергә тәкъдим итә. Әмма бу бик кыйммәтле юл, ашлыгың кире кайтканда алтын бәясенә төшәргә мөмкин. Исәпли белгән хуҗалар аны үзендә булдыра.
29 июльгә булган мәгълүматларга караганда, игеннәрне урып-җыюга “Татарстан”, “Арча”, “Курса МТСы”, “Аю”, “Мәрҗани” хуҗалыклары кереште. Якындагы көннәрдә бу исемлек зураер дип ышанырга кирәк.
Комбайнчылар өчен район буенча кызыксындыру чаралары эшләнде. Аларның эшенә атнага ике тапкыр йомгак ясала. Җиңүчеләргә район җитәкчесенең бүләкләре тапшырыла. Шулай ук атна саен иң күп уңыш алган хуҗалык агрономы, комбайннар иң югары җитештерүчәнлеккә ирешкән хуҗалык инженеры, иң күп мәйданнарның игене җыйнап алынган хуҗалык җитәкчесе билгеләп үтеләчәк.
Көзге чәчү вакыты да якынлаша. Быел барысы 25 мең гектарда чәчү планлаштырыла. “Татарстан” ширкәте 1150 гектарда җир әзерләде инде. “Курса МТСы”нда 900 гектар.
Ильяс Фәттахов