БЕР УЧ АРЫШ САЛАМЫ...

БЕР УЧ АРЫШ САЛАМЫ...
Район үзәк китапханәсендә язучылар белән очрашу булды. Якташларыбыз Рифат Җамал, Хәнәфи Бәдигый, Сания Әхмәтҗанова һәм күрше Балтачтан Гарифҗан Мөхәммәтшин белән җылы мохиттә аралашу иде ул. Очрашуны бүлек мөдире Әлфия Галимҗанова алып барды.
Район китапханәчеләре, «Каурый каләм» иҗат берләшмәсе әгъзалары, шигърият яратучылар белән зал шыгрым тулы иде. Язучыларның үзләре турында сөйләп тормыйм, алар шигырьләрендә нәкъ үзләре. Рифат Җамал (чыгышы белән Мирҗәмнән) йөрәгендәгесен ничек оста итеп әйтеп биргән:
Кемнеңдер хыялы –
Тау-тау алтын.
Ә минем күңелемә
Бер уч арыш саламы
Күпкә якын.
***
Алда-артта
яманлыйлар –
Кайчак үләсем килә:
Үлгәннәр бездә яхшылар –
Яхшы буласым килә.
“Керик әле урманнарга” җырын мәҗлесләрдә яратып җырлыйлар. Ә аның сүзләрен Балтачтан Гарифҗан Мөхәммәтшин язган. “Робагыйлар бакчасы” китабына күз салыйк:
Бабайларда булган
изге хасият –
Улларына калдырганнар
васыять,
Уллар сорый хәзер
акча калдыруны,
Хасиятең, васыятең –
анысы ят...
***
Елан белән күрешкәндә
үбешмиләр,
Бүре белән кочаклашып
күрешмиләр.
Тик бармы соң
күрешкәнче, үбешкәнче
Кемнең елан,
кемнең бүре икәнлеген
белүчеләр?
“Өч Пошалым – өч игезәк” исемле җырның сүзләрен язган Курса-Почмак кызы Сания Әхмәтҗанова иҗаты белән танышыйк:
Азмы әллә үзе
парлы булып,
Ялгызлыкта гомер
иткәннәр!
Сез алардан
күпкә бәхетлерәк,
Гомер буе тиңен
көткәннәр. “Ялгызларга”.
Чыгышы белән Мөрәледән Хәнәфи Бәдигыйның “Өф-өф итеп тоталар” шигыреннән өзек:
– Озак яши күр, әнкәй, – дип
Өф-өф итеп тоталар.
Туры әйткән сүзләрен дә
Чәйнәмичә йоталар.
Пенсиясе җитеп тора
Утка-газга түләргә.
Килен хәтта әзер тора
Каенана өчен үләргә.
Шуңа алар мактап туялмый:
– Путин юлы туры, – дип. –
Пенсияле каенанабыз –
Өебезнең нуры, – дип.
Язмамны Сания Әхмәтҗанова сүзләре белән тәмамлыйсы килә:
Шигырь укый ханым.
Мендәрендә –
Шагыйрь бүләк иткән
китабы.
Янәшәдән, мышнап,
ире дәште:
“Сүндер утны, йоклап
киталмыйм”.
(“Йоклый алмыйлар”).
... Вакыт вакыт язучылар белән очрашу, китап уку кирәк шул. Үзеңне, тормыш рәвешеңне читтән генә күрү өчен булса да. Рәхмәт китапханәчеләргә, шундый матур очрашу оештырганнары өчен.
Румия Саттарова