ҖИҢҮЛӘРЕН ДӘ КҮРЕРБЕЗ

ҖИҢҮЛӘРЕН ДӘ КҮРЕРБЕЗ
Дөнья чемпионатын ачу тантанасында Россия Президенты Владимир Путин һәм Татарстан лидеры Рөстәм Миңнеханов катнашты.
Казанда спортның су төрләре буенча дөнья чемпионаты үтә икән, димәк, Татарстанны беләләр, таныйлар, республика лидеры сәясәтен, инициативаларын, программаларын хуплыйлар. Республиканың зур спорт вакыйгасын оештыра алачагына ышаналар. Казан спортчыларны, кунакларны кабул итәргә әзерләнде, башкалабыз тагын да матурланды, аның дөнья һәм ил күләмендә абруе артты. Казан бүген Россиянең профессионалларга һәм спорт сөючеләргә шөгыльләнү өчен менә дигән инфраструктуралы спорт башкаласына әйләнде.
Гомумән, Татарстан – республика президент программаларын тормышка ашыручы үзенчәлекле төбәк. 2013–2014 елларда гына да республикада 322 спорт мәйданчыгы төзелгән. Спорт корылмалары башкалабызда гына түгел, башка шәһәрләргә дә, район үзәкләренә, авылларга да төзелде һәм төзелә. Соңгы 5 елда безнең районда Боз сарае, 11 спорт мәйданчыгы төзелде, быел тагын 5 спорт мәйданчыгы төзү планлаштырыла. Район үзәгендә бассейнлы нинди зур спорт комплексы, Боз сарае эшли. Арча стадионында спорт мәйданчыгы, балаларның ял мәйданчыгы, быелдан мини футбол мәйданы яшьләрне үзенә дәшеп тора. Арча стадионы – менә дигән ял итү үзәге. Узган ел 1 километрдан артыграк биатлончылар трассасын яңадан түшәделәр. Анда ел әйләнәсе биатлончылар, велосипедчылар, йөгерүчеләр, җәяү йөрүчеләр шөгыльләнә, сәламәтлекләрен ныгыта.
Район үзәге янәшәсендәге Айван авылы башына узган ел спорт мәйданчыгы эшләп куйдылар. Ул, заманча рух биреп, авылны бизәп тора.
– Спорт мәйданчыгы көн саен ачык, ачкычы янәшәдә генә яшәүче Айгөл Гарифуллинада, – дип сөйли шушы җирлектәге Арчаның 7нче мәктәбе директоры Альмира Гатауллина. – Балаларның да, зурларның да яраткан урыны ул.
– Мин үзем хоккей белән шөгыльләнәм, – дип сөйләде Айванда яшәүче 5 сыйныф укучысы Инсаф Юзаев. – Арчага Боз сараена йөрибез. Авылда иптәшләрем белән спорт мәйданчыгында волейбол, баскетбол, мини футбол уйныйбыз. Безнең өчен бик әйбәт булды ул.
Яшьләрне спортка тарту өчен янып-көеп йөргән Арча педагогика көллиятенең тәҗрибәле физик тәрбия укытучысы Бари Бакиров фикерләре белән дә кызыксындык.
– Спорт мәйданчыгы бик кирәкле корылма, – диде ул. – Төзүчеләр дөрес итеп, тиешенчә эшләсеннәр генә. Безнең яшьләр рәхәтләнә шунда уйнап.
– Авыл җирендә спорт мәйданчыгы булу яшьләр өчен бәхет, – дип сөйли Яңа Кырлай мәктәбе директоры Хәмбәл Зарипов. – Быел Яңа Кырлай авылында да спорт мәйданчыгын эшләп бетереп киләләр. Җәйге чор өчен менә дигән корылма ул! Тигез җирдә волейбол, баскетбол уйнавы гына да ни тора?! Туп читкә китми. Бездә кызларның волейбол командасы тупланды. Яшь физкультура укытучысы Фаил Галимҗанов эшлим дип тора.
Шартлар тудырыла, Аллаһы боерса, нәтиҗәләрен дә күрербез әле!
Румия Надршина