Гөлнара, Гөлгенә, Лилия, Халисә – җиңүчеләр

Гөлнара, Гөлгенә, Лилия, Халисә – җиңүчеләр
Транспорт белән идарә итүчеләр арасында хатын–кызлар саны артканнан–арта бара. Алар хәзер төрле бәйгеләрдә катнашып, үзләренең осталыкларын да сынарга күп сорамый. Безнең районда да менә ничәнче ел рәттән инде ярыш оештырыла. Бу матур традиция быел да дәвам итте. 3 августта ЮХИДИның Арча бүлекчәсе ”Автоледи–2015” бәйгесе үткәрде.
Ярышка килгән хатын–кызлар башта юл хәрәкәте кагыйдәләре буенча сорауларга җаваплар бирде. Шушмабаштан Лилия Шәйхетдинова күз ачып йомганчы 20 сорауга җавапны бер хатасыз язып та чыкты.
—Минем имтихан биреп, машина йөртү таныклыгы алуыма һәм руль артына утыруыма әле 3–4 ай гына. Анда да сорауларга бер хатасыз җавап биргән идем, – ди Лилия. – Ярышка да осталыгымны исбатларга дип түгел, ә киресенчә, тәҗрибәле машина йөртүчеләрне карарга, үземне тагын бер кат тикшерергә дип килдем. Мин Арча педагогика көллиятен тәмамлап, Алексеевск районына укытырга киттем. Машина йөртү миңа ерак араларны якын итеп туган авылыма кайтып йөрү өчен кирәк. Менә янымда җанатарларым—сеңелләрем Илүзә белән Зилә дә бар. Алар миңа көч, куәт өсти.
Ә менә беренче медицина ярдәме күрсәтү буенча катлаулы да, шул ук вакытта гади дә кебек, әмма аларны белү бик кирәк тә булган сорауларга Арчадан Гөлнара Фәйзрахманова иң дөрес җаваплар бирде. Әлбәттә, монда руль артында утыру стажы булу да үзенекен итми калмагандыр. Чөнки шәхси фирмада хисапчы булып эшләүче Гөлнараның руль артында йөри башлавына декабрьдә 13 ел була икән.
– 2002 елда машинага утыр-дым, – ди ул. – Минем бөтен апа–сеңелләрем транспорт белән идарә итә. Мин дә кызыктым. Ул вакытта хатын–кыз машина йөртүчеләр сирәк иде әле. Бу ярышларда икенче тапкыр катнашам. Беренчесендә призлы урынны яулап булмады.
Күренеп тора, Гөлнара бу юлы җиңү өчен көрәшергә килгән. Хәер, ярышта катнашучыларның һәрберсе призлы урынны яуларга омтыла. Кызларга уңышлар телик. Чөнки алда әле бәйгенең иң катлаулы этабы–фигуралы йөрү калды. Анысы, машинаның техник яктан төзеклеген тикшергәннән соң, автодромда үтте.
– Дүртенче ел инде мондый ярышларда катнашам, – ди Зур Бирәзә кызы Гөлгенә Бакирова. – Беренче елны өченче урынны алсам, икесендә икенче булдым.
Бу юлы да Гөлгенә икенче урынны яулады. Ә беренче урында Гөлнара Фәйзрахманова, өченче урында Лилия Шәйхетдинова. Түбән Мәтәскәдән Халисә Сәгъдиева дүртенче булды.
– Мин 2010 елда машина йөртү таныклыгы алдым, – ди ул. – Казиле мәктәбенә укытырга йөрү өчен дип руль артына утырдым. Баштарак җайсызрак булды, хәзер машинасыз йөрүне күз алдына да китерә алмыйм.
– Бу ярышларның соңгысы түгел. Икенчесендә җиңәрбез, – диде Халисәнең ире, бу юлы җанатары да Илнар.
ЮХИДИның Арча бүлекчәсе җитәкчесе Илдар Нотфуллин җиңүчеләргә грамоталар, истәлек бүләкләре тапшырды. Хәзер Гөлнара Фәйзрахманова республика ярышында Арча данын яклаячак.
Гөлсинә Зәкиева