Казан Сабантуенда

Казан Сабантуенда
1 август көнне Казан халкы, дөньяның төрле төбәкләреннән килгән меңләгән кунаклар даны еракларга таралган милли бәйрәмебез – Сабантуе шаһиты булды.
Тынычлык бистәсе янындагы Каенлыкта үткән Сабантуйда ел да кунаклар күп була. Быел бирегә Татарстан башкаласында барган йөзү буенча дөнья чемпионатында катнашучылар да килде.
Арчалылар көне буе кунакларның күңелләрен күрде. Арча гына түгел, республиканың башка районнары да биләмәләрен булдырып, үзе зур урам барлыкка килгән иде. Матурлыкның чиге юк. Һәрберсе бар булган фантазиясен туплап, бик матур күренешләр хасил иткән. Бу фикер белән казанлылар гына түгел, чит илләрдән килгән кунаклар да килешер, дип уйлыйм.
Арчалылар биләмәсенә дә ул көнне кунаклар күп керде. Аларны милли киемнәрдән чәкчәкләр белән гүзәл кызлар, өлкән буын вәкилләре каршы алды. Кунакларга татар халкының тормышы, көнкүреше, аларның ничек матур итеп бәйрәм итүләре күрсәтелде.
Ә безнең Арча ягының мактанырлык әйберләре бар. Эштә дә уңган, сәхнәдә дә булган алар. Кочак җәеп каршы ала, сыйлый, кунак итә дә белә. Бу көнне дә үзләре генә дә тулы бер бәйрәм оештырдылар. Үзешчәннәр көне буе сәхнәдән төшмәде. Сабантуйның күрке булган төрле милли уеннар оештырылды. Чүлмәк тә ваттылар, күзне бәйләп әйбер дә кистеләр. Татар халкының дәртле бию көенә кунаклар да битараф калмады. Теләге булган кеше ”Президент белән бергә” хәрәкәте активистлары ГТО нормаларын тапшырырга тәкъдим итте.
Хезмәттә дә уңган безнең халык. Иген игә, терлеген асрый, шуның өстенә кул эшләренә дә өлгерә, сәхнәләргә дә күтәрелә. Яшьләр генә түгел, хәтта өлкәннәребез дә бу яктан сына- та торганнардан түгел. Шура авылында эшләп килүче “Чордашлар” ветераннар ансамбле чыгышларын, аларның ничек чыпта сугуларын, күңел ачуларын күреп сокландылар. Яңа Кырлай мәктәбенең хезмәт укытучысы Илһам Госмановның агачны чокып, Ташкичүдән Рамил Мәгъсумов белән Әхмәт Гыйзәтуллинның тимердән ясаган эшләнмәләрен, Илсөя Әхмәдиева чиккән читек–чүәкләрне, икенче мәктәптән Ләйсән Алмаеваның чиккән түбәтәйләрен яраттылар, Арчаның җиденче урта мәктәбе укытучысы Альбина Зыятдинованың бизәкләр чигеп теккән татар хатын–кызлары яулыкларын шунда ук алып бетерделәр. Умартачы Ядкәр Мөхәммәдиевның бал продуктлары белән кызыксынучылар да күп булды. Яңа Чуриледән Ильяс Халитовның кош–кортлары шунда ук кунак- лар игътибарын җәлеп итте.
Әйе, сүз дә юк, безнең арчалылар оештыра белә. Гади дә, зәвыклы да, матур да. Иң мөһиме, һәр тарафтан җылылык бөркелеп тора. Арча районы биләмәсендә кунакта булган Татарстан Республикасы Премьер – министры урынбасары, авыл хуҗалыгы һәм азык-төлек министры Марат Әхмәтов, Татарстан Республикасы Дәүләт Советы депутаты Разил Вәлиев та арчалылар хезмәтен югары бәяләп, бу хакта район җитәкчесе Илшат Нуриевка җиткерде.
Сабантуй төп мәйданда дәвам итте. Биредә кунаклар милли көрәш карады, төрле уеннарда катнашты, татар эстрадасы йолдызлары һәм сәнгать осталары чыгышы белән хозурланды.
Гөлсинә Зәкиева