ВАКЫТЫНДА ТАПШЫРАБЫЗ

ВАКЫТЫНДА ТАПШЫРАБЫЗ
Икътисади кризиска карамастан, республика президент программалары буенча 2015 елда да мәктәпләрне ныклап төзекләндерү, яңа мәктәпкәчә балалар учреждениеләре төзү дәвам итә. Бу юнәлештә безнең районда да күләмле эш алып барыла. Бүгенге көндә Арчаның өченче мәктәбе һәм Арча станциясендәге 11нче балалар бакчасында эш төгәлләнү алдында тора.
Бөтен урамның күрке булып торган искиткеч матур бинага әверелде өченче мәктәп. Соңгы елларда ул башлангыч мәктәп булып торды. Хәзер шуңа өч катлы янкорма өстәлде.
– Беренче катында 40 балага исәпләнгән (ике төркем) балалар бакчасы, ашханә, кухня, икенче катында медицина, процедура кабинетлары, китапханә, душ кабиналары, спорт, актлар заллары, җитәкчеләр өчен кабинетлар, өченче катында филология кабинетлары булачак, – диде ”Арча КСМ”ы ширкәтенең төзелеш буенча прорабы Айрат Хәбиров.
– Бишенче сыйныф та өченче катта укыячак, – дип өстәде мәктәпнең укыту эшләре буенча директоры урынбасары Алсу Сабирҗанова.
– Ә өлкәнрәк сыйныфлар өчен уку бүлмәләре кайда?
– Быел без бишенче сыйныфка гына балалар алабыз. Киләчәктә аларны үзебезнең мәктәптә үзебез үстерәбез, – диде ул. – Сәләтле балалар өчен аерым фәннәрне тирәнтен өйрәтә торган өченче төп гомумбелем мәктәбе – ”Сәләт” белем үзәге буларак, гуманитар фәннәрне тирәнтен үзләштерергә теләгән балаларны кабул итәчәкбез.
Мәктәптә балаларга уку өчен барлык мөмкинлекләр дә булачак. Сыйныф бүлмәләре иркен, якты, матур, спорт белән шөгыльләнү өчен дә шартлар тудырылган. Тәҗрибәле укытучылар гына белем бирәчәк.
Мондый мәктәптә укучылардан ”эх, безнең заманда булмады бит мондый шартлар, мөмкинлекләр”, дип көнләшерлек тә.
Ә әлегә биредә кызу темплар белән эш бара. Төзүчеләр бинаны яңа уку елына өлгертергә ашыга.
– Эшчеләр җитә, материаллар вакытында кайтарыла. Бинаның эчке ягында да, тирә – ягын төзекләндерү буенча да эш бара. Мәктәпнең укытучылар коллективы да бик булыша. Безнең бер объектны да вакытында тапшырмый калган юк әле, – ди ”Арча КСМ”ы ширкәте җитәкчесе урынбасары Азат Җәләлетдинов.
Арча станциясендәге элекке алтынчы мәктәп урнашкан бина да бөтенләй диярлек үзгәреш кичергән.
– Өр – яңадан эшләнде, дисәң дә ялгыш булмас. Искесеннән фундаменты гына калды дисәң дә була, – ди шушында булачак 11нче балалар бакчасы җитәкчесе Гүзәл Хәбибуллина.
Бина үзе дә, тимер коймалары да балалар ”патшалыгын” тасвирлагандай төрле төскә буялып, ерактан ук күзгә ташланып тора.
– 80 урынга исәпләнгән балалар бакчасында биш төркем оештырылачак. Бер ясле, өч, дүрт яшьлекләр төркемнәре эшләячәк. Балалар өчен барлык мөмкинлекләр дә бар. Аерым спорт, музыка залы, татар теле, логопед (бу әле районда ”Шатлык”тан кала икенче балалар бакчасында гына) кабинетлары булачак. Урамда да спорт, уен мәйданчыклары, шулай ук уйнау өчен беседкалар төзелә, – ди Гүзәл Хәбибуллина.
Бүген биредә дә кызу урак өсте. Бинаны август ахырына эшләп бетерергә кирәк.
– Күп эш калмады инде. Бинаны билгеләнгән срокта тапшырабыз, — ди прораб Марсель Сафиуллин.
Гөлсинә Зәкиева