ХАЛЫК БЕЛӘН КИҢӘШЕП

ХАЛЫК БЕЛӘН КИҢӘШЕП
5 августта район башкарма комитеты җитәкчесе Илшат Нуриев Арча шәһәренең көньяк микрорайонында яшәүчеләр белән очрашты.
Очрашуны шәһәр башкарма комитеты җитәкчесе Рафил Исмәгыйлев ачты һәм алып барды.
Район җитәкчесе Илшат Нуриев үзенең чыгышында районда барган матур үзгәрешләр, киләчәккә планнар турында сөйләде.
— Республиканың районга ярдәме бик зур, — диде ул. — Быел гына да 1 млрд. сумга якын акчалата ярдәм керде, төзелешләр, төзекләндерү эшләре киң колач белән алып барыла. Өченче мәктәпнең яңа бинасы ачылу алдында. Район хастаханәсе зур үзгәрешләр кичерә. Бөтен эш халыкның киләчәк тормышын яхшырту өчен башкарыла.
– Балалар – безнең киләчәгебез, — диде Илшат Нуриев. — Аларны дөрес итеп тәрбияләсәк, киләчәгебез ышанычлы булыр.
Шәһәрдә 970 бала икенче сменада укый. Бурыч — бер генә сменага калдыру. Көнбатыш микрорайнында яңа мәктәп салу буенча эш алып барыла. Белем бирү буенча безнең район узган ел унтугызынчы урында гына булды. Без моның белән килешә алмыйбыз.
Эш урыннары булдыру юнәлешендә планнар бар, берничә сәнәгать мәйданчыгы төзеләчәк. Иң ышанычлысы — үз эшеңне булдыру. Иң мөһиме — курыкмаска, бездән ярдәм булыр.
Юллар начар булу борчый. Бөтенләй юлы булмаган авыллар бар. Шәһәрнең көньяк микрорайонында да урамнарның торышы әйбәттән түгел. Ел саен күп эш башкарыла, әкренләп барысына да чират җитәр дип ышанасы килә.
Илшат Нуриев сорауларга да җавап бирде. Алар урамнар начар хәлдә булу, урам утлары янмау, балалар мәйданчыклары аз булу, суның сыйфаты турында иде. Район җитәкчесе аларның һәркайсы контрольгә алыначагы турында әйтте.
Ильяс Сәхәпов