ЯРДӘМ БУЛГАНДА ЭШЛӘР АЛГА КИТӘ

ЯРДӘМ БУЛГАНДА ЭШЛӘР АЛГА КИТӘ
Татарстан Республикасы Президенты вазыйфаларын вакытлыча башкаручы Рөстәм Миңнеханов урып-җыю кампаниясенең барышын контрольдә тотып, республика басуларын вертолетта карап чыга. 30 июльдә ул Арча районында да булып, игеннәрнең торышын әйбәт дип бәяләде, аларны югалтуларсыз җыйнап алу буенча киңәшләрен бирде.
Татарстан — күп икътисадый күрсәткечләр буенча, шул исәптән авыл хуҗалыгында да лидер төбәк. Җирле авыл хуҗалыгы җитештерүчеләре үз продукцияләре белән бөтен республиканы туендыра алалар.
— Авыл хуҗалыгы районы булган Арча районы өчен республика президент программалары бу тармакны үстерүгә зур этәргеч булды, — ди район башкарма комитеты җитәкчесе Илшат Нуриев. — 2014 елда 40х60 программасы буенча техника алу өчен республика бюджетыннан 45 млн. 754 мең сум ярдәм күрсәтелгән булса, быел алты айда гына да 26 млн. 596 мең сум акча бирелде. Быел хуҗалыкларга алты яңа трактор, алты комбайн, унлап туфрак эшкәртү техникасы, биш машина, бер бәрәңге алу комбайны кайтты. Техника паркының шактый тузуын исәпкә алсак, аны яңартуга саллы өлеш бу.
Шулай ук тотылган чыгымнарны киметү максатында 1 литр сатылган сөткә 2014 елда 47 млн. сумнан артык, быел алты айда 35 млн. сумга якын субсидия бирелде.
Узган ел хуҗалыклар үсемлекчелек өлкәсе өчен федераль һәм республика бюджетларыннан 165 млн. 888 мең сум ярдәм алганнар иде, быел алты айда 102 млн. сумнан артык алдылар. Кредит процентларын түләү өчен былтыр 61 млн. 825 мең сум, быел алты айда 157 млн. 596 мең сум түләнде.
Шәхси хуҗалыкларга күрсәтелгән ярдәмгә килсәк, безнең районнан 16 гаилә фермасы 13 млн. сумнан артык кире кайтармый торган субсидия алды. 31 хуҗалыкка 25 млн. 972 мең сумлык грантлар бирелде.
Айван авылында яшәүче Нафил Гатауллин үстергән бәрәңге һәм кәбестәләрне Рөстәм Миңнехановка да күрсәттеләр.
— Районның яңа җитәкчесе миңа 20х80 программасына керергә тәкъдим итте, министр Марат Әхмәтов хуплады, — ди Нафил. — Сугару системасының 80 процентын дәүләт түләде, миңа 20 проценты гына калды. Иртә сорт бәрәңге утырттым, үзем тракторчы да мин. 23 июльдә бәрәңгене ала башладык, Казанда, Арчаның үзендә дә сорау зур. Шундый программалар өчен рәхмәт, киләчәккә яңа планнар белән яшим.
Бөек Тукайны биргән Кушлавыч авылында (“Тукай” ширкәте) комбайнчы Илфар Гыймадиев белән сөйләшәбез.
— Ничә ел акча күргән юк иде, яңа инвестор килгәч куанып бетә алмыйбыз, — диде ул. — Эшләгәнгә вакытында түлиләр, киткән кешеләр кире кайта башлады.
Терлек торакларын төзекләндерү, яңаларын төзү программалары көтеп алынган булып чыкты. “Курса МТСы”, “Ватан”, “Северный” хуҗалыклары аннан бик уңышлы файдаланалар.
Иң зур үзгәрешләр — “Тукай” ширкәтендә. Инвестор Рәфыйк Хөснетдинов килгәндә хуҗалыкта 70 баш мөгезле эре терлек калган булса, ул сыерларны 200 башка җиткерде инде. 500 баш сыерга исәпләнгән тагын бер торак төзиләр, 700 сыер, бозаулары белән бер мең баштан артачак. Димәк, тагын күпме кешегә эш урыны була дигән сүз. Читкә киткән механизаторлар кире кайткан. Бүгенге көндә 60лап кеше эшли, яңа төзелә торган фермалар авылның ныклыгын арттыра.
Сүз уңаеннан, быел иң югары арыш уңышы шушы хуҗалыкта, гектардан 40 центнердан артык чыга.
— Республика президент программалары авыл хуҗалыгында эшләүчеләргә зур мөмкинлекләр ачты һәм аларның уңай нәтиҗәләре күз алдында, — ди район авыл хуҗалыгы һәм азык-төлек идарәсе җитәкчесе Айдар Габбасов. — Без моңа күп мисаллар китерә алабыз.
Район хуҗалыкларында мөгезле эре терлекләр саны 2014 елга караганда 342 башка артты, 265 бозау күбрәк алынды. Ит җитештерү — 5, сөт җитештерү (шәхси хуҗалыкларны да кертеп) 6 процентка артты.
Ильс Фәттахов