Матурлык тудыра белгән җирдә

Матурлык тудыра белгән җирдә
Агымдагы елның 8 августы Арча тарихына яңа сәхифә белән кереп калачак. Бу көнне Арчада тәүге тапкыр мөселман балалар Сабантуе узды.
Балтачлылар мондый рухтагы Сабантуйларны инде алты ел рәттән тамаша кыла. Бөрбаш авылында ел да республика мөселман балалар Сабантуе уза. Бездә дә мондый рухи бәйрәмнең киләчәге дәвамлы булыр, иншалла. Бәйрәмгә мөхтәрәм кунакларның зурлап кайтуы, әлеге башлангычка фатиха бирүләре үзе үк игътибарга лаек. Мәртәбәле кунаклар арасында ТР Диния нәзарәте рәисе урынбасары Рөстәм хәзрәт Хәйруллин, Татарстанның баш казые Җәлил хәзрәт Фазлыев һәм күрше районнарның мөхтәсибләре бар иде.
Рәмис хәзрәт Гарифуллин һәм Раил хәзрәт Гыйләҗев тарафыннан Коръән аятьләре белән башланып киткән бәйрәмне район башкарма комитеты җитәкчесе Илшат Нуриев ачып җибәрде.
Бәйрәмдә балаларга үзләрен сәнгать һәм спорт ягыннан гына түгел, дини яктан да белемнәрен, Коръән аятьләрен белүләрен күрсәтү өчен дә мөмкинлекләр күп иде. Өстәвенә, белгәнең өчен бүләк тә аласың. Бүләкләр шактый өләшенде бу көнне. Республика күләмендә Ак мәчеттә узган “Авылым мәчете” конкурсында Коръән уку бәйгесендә, район күләмендәге имамнарның азан әйтү, мөгаллимәләр бәйгесендә, мөнәҗәт әйтүчеләр бәйгесендә җиңүчеләр, мәктәпләрдә физик культура дәресләрен алып баручы районның алдынгылары булган укытучылар бүләкләнде, Илшат Габделфәрт улы быел белем йорты бусагасын тәүге тапкыр атлап керүче укучыларга букчалар тапшырды. Букчалар район хакимиятендә эшләүчеләрнең хезмәт хакларыннан бирелгән акчага алынган.
Иҗади яктан сәләтле укучылар да читтә калмады. ТР хәрби комиссариатның Арча һәм Әтнә районнары буенча бүлеге “Арча хәбәрләре” газетасы редакция- се белән берлектә уздырган “Туган ил кайдан башлана?” конкурсы һәм район газетасы сайтында узган “Балам–багалмам” фотоконкурсы җиңүчеләре дә бүләкләнде. Рөстәм хәзрәт Хәйруллин да бүләксез кайтмаган. Ул районыбызда динне олылап, халык күңеленә иман нуры тарату өчен янып–көеп йөрүчеләргә ТР Диния нәзарәтенең рәхмәт хатларын тапшырды. “Сезнең райондагы кебек 79 мәчете булган район республикада юк. Дини башлангыч белем бирү, халыкны мәчеткә тарту буенча сезнең кебек тырышучылар һәркемгә үрнәк”, — диде ул.
Бәйрәмне район мәдәният йорты, балалар сәнгать мәктәбе, балалар бакчалары, мәктәп укучылары тарафыннан әзерләнгән чыгышлар аеруча ямьләде. Җыр–бию, сәнгатьле укуга осталыкларын күрсәтте алар.
Мөселман Сабантуе булгач, әлбәттә, балалар күңеленә бераз гына булса да дини орлыклар сибелми калмый. Стадион күгенә таралган моңлы азан тавышы, аннан махсус урыннарда ир–атларның һәм хатын–кызларның өйлә намазын укуына беркем дә битараф калмагандыр. Дини гыйлемен, догалар белүен күрсәтергә балаларга да уңай форсат булды – алар мөнәҗәт әйтүдә, Коръән аятьләрен яттан укуда бер–берсен узып ярышты.
Сабантуйны спорт уеннарыннан башка күз алдына китереп тә булмый. Балалар һәр уенда, ярышта үз көчләрен күрсәтергә тырышты.
Ә милли бизәк — көрәш. Районда яшь көрәшчеләрнең күплеге үзе сөенеч. 36 килограммга кадәрле авырлыктан башлап 60 килограммнан югары авыр- лыктагы яшь көрәшчеләр арасында җиңүчеләр дә, җиңелүчеләр дә булды. Тырышлык, көч бәрабәренә яуланган җиңү кадерле була. Сабантуйның абсолют батыры булып калган Сарай–Чокырчадан Айдар Мөхәрләмов өчен татлыларның татлысы иде бу җиңү. Ә иң дулкынландырганы район җитәкчесе Илшат Нуриев кулыннан скутер ачкычы алу булды. Быел 7 нче сыйныфка барганда ул мәктәпкә инде скутерлы яшь көрәшче булып барачак. Көрәш белән бер ел элек кенә ныклап шөгыльләнә башлаган Айдар быел Курса сабантуенда үз авырлыгында җиңүче булса, бүген менә район күләмендә. Тренеры Мөдәрис Лотфуллин егеткә зур өметләр баглый.
Татар халкының милли гимнына әйләнгән “Туган тел” җыры белән тәмамланды бәйрәм. Туган тел, сабантуй кебек милли төшенчәләр бергә янәшә булганда, киләчәк буыннар иман ныклыгын җуймас. Җәлил хәзрәт әйтмеш- ли, матурлыкны тудыра белгән җирдә әле тормыш дәвам итәчәк.
Розалия Зиннәтова