Җиңүчеләр бүләк ала

Җиңүчеләр бүләк ала
10 августка район хуҗалыкларында игеннәрнең 18607 гектары (35,3 проценты) суктырып алынды. “Татарстан”, “Кырлай”, “Ватан”, “Курса МТСы” ширкәтләрендә 54–47 процент мәйданнарда җыйнап алынды.
Узган атнада урып–җыюда иң югары җитештерүчәнлеккә “Ватан” хуҗалыгы иреште. Әлеге хуҗалык җитәкчесе Мансур Әхмәтовка район җитәкчесе Илшат Нуриев Рәхмәт хаты һәм акчалата бүләк тапшырды.
Шулай ук бер атна эчендә гектардан иң күп уңыш (41 центнер) җыеп алган “Кырлай” ширкәте баш агрономы Данил Шәяхмәтов, комбайннар иң югары җитештерүчәнлеккә ирешкән өчен шушы хуҗалыкның баш инженеры Фаил Хәлиуллин, өч көндә иң күп ашлык суктырган “Татарстан” ширкәте комбайнчылары Фәрид Хөснетдинов, Фәнил Зиятдинов, “Тукай” ширкәте комбайнчысы Рәдиф Сәфәров район җитәкчесе бүләкләренә лаек булдылар.
— Сезнең уңышларны күреп шатланабыз, алдагы көннәрдә дә шулай булырга язсын, исән–имин эшләгез! — диде Илшат Нуриев “Тукай” ширкәте комбайнчысы Рәдиф Сәфәровка бүләкләр тапшырганда.
“Тукай” ширкәтендә арыш бигрәк тә уңган, гектардан 45 центнерга якын чыга. Суктырылган теземнәр шундый калын, тиз генә атлап чыгам димә. Алдагы елны әлеге басуга мул итеп органик ашлама керткән булганнар.
“Кырлай”, “Ак барс” агрокомп- лексы” ширкәтләрендә дә гектардан уртача уңыш 40 центнердан артык. “Игенче”, “Ватан”, “Ак барс” агрокомплексы”, “Кырлай” ширкәтләрендә борчак гектардан 31–29 центнер уңыш биргән.
“Татарстан”, “Северный”, “Ак барс” агрокомплексы”, “Мәрҗани” ширкәтләре 295–200 гектарда арыш чәчтеләр. “Арча” ширкәте дә чәчә башлады. Көзге культуралар барысы 26200 гектарда чәчеләчәк.
“Ватан” хуҗалыгы 200 тонна сабан культуралары орлыклары салып куйды. “Арча” ширкәте — 140, “Татарстан” ширкәте 80 тонна орлык әзерләде.
Район буенча бер шартлы терлеккә 21 центнер азык берәмлеге әзерләнде. “Ватан”, “Кырлай”, “Ак барс” агрокомплексы” ширкәтләрендә 28–25 центнер азык берәмлеге туры килә.
Крестьян фермер хуҗалыкларында да кызу көннәр. Айван авылында яшәүче Нафил Гатауллин үзенең 5 гектар җирендә бәрәңге һәм кәбестә үстерә. Иртә өлгерешле “Жуковский” сорты бик уңган. Аны 23 июльдә үк ала башлаганнар. Ярдәмчеләре дә ышанычлы — хатыны Илсөя, аграр академиядә агроном–икътисадчы булырга укучы уллары Нәүфәл, медицина академиясендә укучы кызлары Ильвина белән бергәләп хезмәт итә алар. Иртә сорт кәбестәне дә алып сатып бетерделәр инде.
— Киләчәктә кәбестә, кишерне эшкәртү цехы ачарга исәп, — ди Нафил.
Ильяс Фәттахов