Алда җитди бурычлар

Алда җитди бурычлар
11 августта Арча муниципаль районы икенче чакырылыш район Советының чираттагы илленче утырышы узды. Ул тарихка бу составтагы район Советының соңгы утырышы булып кереп калыр. Киләсе утырыш 13 сентябрь сайлауларыннан соң яңа составта узачак.
Бу утырышта район тормышына кагылышлы ун мәсьәлә каралды. Алар башлыча район Советының хокукый-норматив актларын гамәлдәге законнар белән тәңгәлләштерүгә бәйле. Карарлар белән Арча районының рәсми сайтында танышырга мөмкин.
Утырышны алып баручы район Советы рәисе урынбасары Любовь Осина ТР Президенты һәм җирле үзидарәләрнең вәкиллекле органнарына депутатлар сайлауга әзерлек чаралары белән таныштырды. Президент вазифасына 4 кандидат теркәлде . Җирле Советларга 172 депутат сайланачак, хәзерге вакытта бу урынга 177 кандидат дәгъва кыла. 138 кандидат “Бердәм Россия” партиясе, 9- “Гадел Россия”, 5- ЛДПР, 4- КПРФ, 2- “Россия коммунистлары” партияләре, 11 кандидат “Татарстан – Яңа гасыр” иҗтимагый хәрәкәте тарафыннан күрсәтелгән, 8 кандидат үз-үзләрен тәкъдим иткән. 15 августта республикада сайлау алды агитациясе башлана. Бу чорда кандидатларның халык белән очрашулары узачак, мәгълүмат чараларында, шул исәптән безнең газетада да сайлау алды агитация материаллары чыгачак. Арча муниципаль районы территориясендә 62 участок сайлау ко миссия- се эшләячәк. Алар составында 390 кеше исәпләнә. Район территориаль комиссиясе һәм участок комиссияләре эшчәнлеге өчен тиешле шартлар тудырыла. Алар бу җаваплы сәяси вазифаны уңышлы башкарып чыгарга бурычлы.
Соңыннан Любовь Михайловна Арча районының социаль-икътисади үсешен тәэмин итүдәге хезмәтләре өчен район Советы һәм җирле Советлар депутатларына рәхмәт белдерде. “Узган биш ел безнең өчен киеренке хезмәт чоры булды. Халыкның тормыш дәрәҗәсен күтәрүгә юнәлдерелгән дәүләт һәм муниципаль программаларны тормышка ашыру өчен дөрес карарлар кабул итү бездән зур оешканлык таләп итте. Биш ел эчендә район Советының 25 чираттагы һәм шуның кадәр үк чираттан тыш утырышлары үткәрелде, аларда 354 карар кабул ителде. Сезнең күбегез киләсе сайлауларда да кандидат буларак катнаша. Барыгызга да уңышлар телим”, — диде ул.
Шул ук көнне район җитәкчесе Илшат Нуриев предприятие, оешма, хуҗалык җитәкчеләре, җирлек башлыклары белән районда урып-җыю барышына кагылышлы мәсьәләләр буенча киңәшмә үткәрде. Илшат Габделфәртович уракны 1 сентябрьгә төгәлләү бурычы куйды. Хуҗалыкларда игеннәрне югалтуларсыз җыеп алу өчен район халкыннан бердәмлек һәм җитәкчеләрдән хезмәтне дөрес итеп оештыру таләп ителә. Район җитәкчесе юл кырыйларында бөртекләрнең чәчелеп яту фактларына тап булуы турында да әйтте. “Мондый тискәре күренешләргә чик куелырга тиеш”, — диде ул. Якташыбыз, халык язучысы Гариф Ахунов әсәрләрендә тасвирланган элекке елларда җиргә һәм икмәккә булган кадер-хөрмәтне мисал итеп китереп, ата-бабаларыбыздан үрнәк алырга чакырды.
Исрафил Насыйбуллин