“Туган ил кайдан башлана?”

“Туган ил кайдан башлана?” конкурсы нәтиҗәләре ТР хәрби комиссариатының Арча һәм Әтнә районнары буенча бүлеге «Арча хәбәрләре» газетасы редакциясе белән берлектә «Туган ил кайдан башлана?» конкурсы үткәрде. Конкурста Ашытбаш мәктәбенең 8 сыйныф укучысы Булат Рәдис улы Хисамиев (укытучысы Рәсилә Хисамиева) җиңеп чыкты.
Конкурста катнашкан Яңа Кишет төп мәктәбеннән Илназ Кәримов, Ралинә Җамалиева, Энҗе Шакирова (укытучылары Гөлфия Фазылҗанова), Мөндеш башлангыч мәктәбенең 4 сыйныф укучысы Инсаф Гыйбадуллин (укытучысы Ильмира Гыйбадуллина) да махсус бүләккә лаек дип табылды. Укучыларга район газетасының грамоталары, ТР хәрби комиссариат җитәкчесе Сергей Погодинның бүләге — канцелярия товарлары кибетеннән мәктәп кирәк–яраклары алу өчен сертификатлар, ә укытучыларга Арча һәм Әтнә районнары буенча хәрби комиссариат җитәкчесе Алмаз Борһановның Рәхмәт хатлары тапшырылды.
Хөрмәтле укучылар! Бүген бәйгедә җиңү яулаган Булат Хисамиевның шигырен сезгә дә тәкъдим итәбез.
ТУГАН ИЛ КАЙДАН БАШЛАНА?
Туган ил кайдан башлана?
Син аваз салган өйдән,
Тәпи атлап киткән җирдән
Тәүге ишеткән көйдән.
Бар җылысын, назын биргән
Сөекле әниеңнән,
Чын ир булырга өйрәткән
Куркусыз әтиеңнән.
Туган ил кайдан башлана?
Газиз авыл кырыннан.
Челтерәп аккан чишмәләрдән,
Борма елга юлыннан.
Яз килүен җиткерүче
Нәни тургай җырыннан,
Болында уйнаклап чапкан
Җитез, йөгерек колыннан.
Туган ил кайдан башлана?
Сөекле мәктәбеңнән,
Хәреф танырга өйрәткән
Беренче мөгаллимнән.
Балачагың шаулап үткән
Кычытканлы тыкрыктан,
Чана-чаңгы шуган таудан,
Серләр тулган офыктан.
Туган ил кайдан башлана?
Ил чиген саклаучыдан,
Дошманнардан, чит-ят кулдан
Ватанны яклаучыдан.
Тынычлык өчен көрәштә
Өзелгән гомерләрдән.
Мәрмәр ташларга уелган
Җуелмас исемнәрдән!
Булат Хисамиев,
Ашытбаш мәктәбе укучысы