Гүзәллек дөньясында

Гүзәллек дөньясында
Матурлыкны күрә алу гына аз, тудыра белү дә кирәк. Ә аның өчен тырышлык кына җитми, бераз гына булса да хыялыйлык та сорала. Тирә – юньнәрен яшеллеккә күмгән, чәчәкләр патшалыгында утырган, төрле фигуралар ясап, үзенең әкияти дөньясын булдырган кешеләргә сокланам мин. Хезмәтеңне итсәң, көчеңне җәлләмәсәң, фантазияңне эшкә җиксәң генә мондый гүзәллек тудырып була.
Беркөн ”Восточный” территориаль җәмәгатьчелек үзидарәсе рәисе Ринат Сафин шәһәрдәге Ахунов урамы, 11нче йортка алып барды.
– Гөлфия һәм Ильяс Гафаровлар йорты бу, – диде ул. – Ишегалларыннан гөлбакча ясаганнар, тирә – юньнәрен яшеллеккә күмгәннәр.
Чыннан да, койма буйлап һәм арт якта күп итеп агачлар утыртылган. Хуҗалар әйтүенчә, биредә 300 төп агач үсә. Махсус санадык, бер буйда гына йөзгә якын иде. Каен, нарат, чыршы, гөлҗимеш, миләш һәм башка агач–куаклар инде биек койманы да үтеп киткән. Яңартылып торалар, күрәсең, араларында әле яшь туералар да бар.
– Утыртканда кечкенә генә үсентеләр иде әле, – ди Гөлфия Гафарова. – Ильяс шундый хыялый кеше инде безнең. Шуларны үзе берәмтекләп утыртты, су сибеп үстерде. Нинди генә агач юк бит анда. Чикләвеккә кадәр бар. Гөмбәгә кадәр үсә. Гөмбә дигәннән, иске йортта яшәгәндә мин аларны үзем махсус үстерә идем.
Өйләренә таба юл алабыз. Йорт каршында тип – тигез итеп чабылган яшел хәтфә үлән, арасында туя агачлары көязләнеп утыра. Чиста, пөхтә, матурлык. Хуҗасының нинди булуын беләсең килсә, капка төбенә күз сал, диләр.
– Анда да чәчәкле газон иде. Ильяска ошамады. Яшел газон күңелгә ятыш, ди. Бик тырыш кеше ул. Кулы белмәгән эше юк. Бер минут тик тормый, юк урында да эш таба, – ди Гөлфия ханым.
– Алар икесе дә искиткеч тырышлар, – ди Ильясның апасы Илсөяр Сафина. – Өй эчләренең матурлыгына исең китәрлек. Ә ишегаллары, бакчалары аеруча сокланырлык.
Килешәм, үзебез дә күрдек. Өйләренә үк кермәсәк тә, территорияләрен барлап чык-тык. Тип – тигез итеп чабылган яшел хәтфә үләннән бакчага таба юл алдык. Теплицада тулы тәртип. Бакчага үрмәле гөлдән ясалган яшел арка аша үтәсең. Аннан инде тар сукмак буйлап сине биек булып үскән эре чәчәкле лилияләр озата бара. Андагы чәчәкләрне күреп күзләр камаша. Ничә төрле чәчәк үстерәсез, дигән сорауга Гөлфия ханым төгәл җавап та бирә алмады. Шунысы кызык, чәчәкләр белән дә Ильяс шөгыльләнә икән.
Ильяс Гафаров үзе лаеклы ялда, ә Гөлфия ханым 30 ел инде шәфкать туташы. Аны белмәгән кеше юктыр да, полик- линикада, психиатр кабинетында утыра ул. Арып – талып кайта да, үз патшалыгында җан рәхәтлеге ала, бакчада эшләүдән тәм таба.
– Мин үзем Васильеводан. Быел әти – әнине дә Арчага алып кайттык. Фатир сатып алдылар. Тик үз йортлары белән яшәргә күнеккән кешеләрнең фатирда тик ятасылары киләмени. Безгә килеп булышып йөриләр. Быел теплица хезмәте минем кулга тимәде дә, әти карады, – ди Гөлфия Гафарова.
Үзләренең 20 сутый җирләре белән генә чикләнеп калмыйча, Урта Бирәзәдә яшәгән кызлары Лианага да ярдәм итәргә вакыт табалар. Андагы 25 сутый мәйданны биләгән учас- токны карап бетерергә дә кирәк бит. Ильяс анда да кияве белән бергәләп 400 төп агач үсентеләре утырткан. Җир яраткан, матурлыкка омтылган, тирә – юнен яшеллеккә күмүдән тәм тапкан кеше өчен мондый мөмкинлек күктән төшкән бәхеткә, кошлар кышын кар астыннан эзләп тапкан җимгә тиң шул.
Гөлсинә Зәкиева