Алар иген үстерә, калалар төзи

Алар иген үстерә, калалар төзи
Татарстан Франция һәм Бельгияне отып WordSkills Competition үткәрү хокукын алды. 2019 елда эшче һөнәрләр буенча чемпионат Казанда үтәчәк.
Россия 2019 елда эшче һөнәрләр осталыгы буенча WordSkills дөнья чемпионатын Казанда кабул итәчәк. Сан-Паулуда дүшәмбе көнне WordSkills International генераль ассамблеясендә халыкара жюри шундый карар кабул итте. Татарстан делегациясен республика лидеры Рөстәм Миңнеханов җитәкләде. Чемпионатны үз территориясендә кабул итү хокукы өчен шулай ук Париж һәм Бельгия Шарлеруары көрәште, әмма жюри әгъзаларының күпчелеге Казан өчен тавыш бирде.
Эшче һөнәрләренең дәрәҗәсен күтәрү, сүз дә юк, турыдан туры икътисадны үстерүгә бәйләнгән, ә бу республика җитәкчелеге һәм аның лидеры Рөстәм Миңнеханов алга куя торган иң өстенлекле бурычларның берсе.
Татарстан җитәкчелеге, республиканың сәнәгать предприятиеләре һәм югары уку йортлары белән берлектә, эшче һөнәрләрне популярлаштыру һәм үстерү белән кызыксына. Узган ел Татарстанда 5 ресурс үзәге барлыкка килде, быел тагын 5әү ачылачак. Республикада барысы 25 иң заманча ресурс үзәкләре булачак. Көллиятләр һәм югары уку йортлары җирле товар җитештерүчеләр белән бөтенләй башка элемтә урнаштырдылар.
Эшче һөнәрләрнең дәрәҗәсен үстерүгә Арча районында да зур игътибар бирелә. Узган шимбәдә үткән киңәшмәдә район җитәкчесе Илшат Нуриев мәктәп территорияләренә эшкә яраклы булудан туктаган комбайн, трактор, машиналарны куярга киңәш итте. “Балалар кечкенәдән күреп үсеннәр, кызыксынсыннар, киләчәктә аларга һөнәр сайлаганда моның ярдәме булмый калмас”, — диде.
Район җитәкчесенең механизатор кадрлар турында борчылуы юкка түгел. Чөнки вакыт аяусыз, тәҗрибә туплаган өлкәннәр сафын тулыландыра барырга, алмашчылар әзерләргә кирәк.
— Быел районда 30 яшькә кадәрге 18 комбайнчы эшли, — ди яшьләр эшләре, спорт һәм туризм бүлеге җитәкчесе Зиннур Сәгыйтов. — Без аларның һәрберсен күз уңында тотабыз, матур күрсәткечләргә ирешүләрен күреп куанабыз.
Зиннур Сәгыйтов яшь комбайнчыларның хәлләрен белеп тора, 12 августта ул “Ак барс” агрокомплексы” ширкәте басуларына барып алдынгыларга Рәхмәт хатлары, бүләкләр тапшырды. Егетләрнең вакытлары бик тыгыз, ашлык бушаткан арада гына сөйләшеп алабыз.
— Мин авылымны бик яратам, — ди Илшат Мәһдиев. — Табигате искиткеч, тырышкан кеше авылда да начар яшәми.
— Мин 5нче сыйныфтан комбайнчы ярдәмчесе булып эшли башладым, — ди Айрат Шәфыйков. — Хәзер менә үзем өлкән комбайнчы, энем — ярдәмчем.
Илшат үзешчән артист, Айрат — көрәшче дә әле.
Бу көнне алар белән бергә Фәнзил Минсафин, Раил Фәйзрахманов, Алмаз Котдусов та буләк алды.
Элегрәк мәктәпләрдә тракторчыга өйрәтү сыйныфлары бар иде. Шәхси эшмәкәр Айдар Сабиров менә шуларны торгызу идеясе белән янып йөри.
— Түбән Мәтәскә урта мәктәбе базасында ачып җибәрәбез аны, — ди ул. — Балалар шулай ук тегүче, машина белән сыер савучы һөнәрләренә өйрәнәчәк.
Мәктәптән соң теләге булганнарны Үрнәктә агросәнәгать көллияте көтә. Анда заманча техника белән идарә итәргә өйрәтәләр, тракторчы–машинистлар, механиклар, электр һәм газ белән эретеп ябыштыручылар, сатучылар, аш пешерүчеләр әзерлиләр.
Көллиятнең Арчада филиалы бар, ул төзүче һөнәрләренә өйрәтә.
— Әлеге филиалны тәмамлаучыларны без көтеп алабыз, аларны безнең күп объектларда очратырга мөмкин, — ди “Арча КСМы” ширкәте җитәкчесе Рафаэль Муллагалиев. — Бик әзер- лекле һөнәр ияләре: ташчылар, монтажчылар, эретеп ябыштыручылар, шомартучы–буяучылар әзерләп чыгаралар. Мин әлеге филиалда эшләүчеләргә “Ярый әле, сез бар!” — дип әйтәм.
Безнең яшьләребез үз бәхетләрен республикада, туган авылларында, шәһәрдә намус белән, тырышып хезмәт итеп таба. Бүген эшче һөнәрләрнең кадере арта. Республика җитәкчелегенең тырышлыгы да шуңа юнәлдерелгән, яшьләребез иртәгә көнгә ышаныч белән карый.
Ильяс Фәттахов