Халык белән бергә

Халык белән бергә
Шәһәребезнең “Питомник” һәм “Үзәк” территориаль җәмәгать үзидарәләре (ТҖҮ) республика бәйгесендә җиңү яуладылар.
“Татарстан Республикасының иң яхшы ел территориаль җәмәгатьчелек үзидарәсе” республика бәйгесендә “Үзәк” ТҖҮсе икенче һәм “Питомник” ТҖҮсе бишенче дәрәҗә дипломга лаек булды.
Бүген әлеге ТҖҮләр җитәкчеләре Рәмзия Хәмидуллина белән Ибраһим Сабиров редакциядә кунакта. Алар белән башкарган эшләре турында әңгәмә корабыз.
Территориаль җәмәгатьчелек үзидарәләре эшчәнлеге нәрсәдән гыйбарәт?
– Йортлар яны территорияләрен төзекләндерү, яшелләндерү буенча эшлибез. Күпфатирлы йортлар янында бу юнәлештә торак милекчеләре ширкәте эш алып бара. Ә менә шәхси йортлар читтә кала. Шуңа аларга да игътибарны юнәлтергә булдык, – ди Ибраһим Сабиров.
– Ишек аллары гына түгел, капка төпләре дә яшеллеккә, чәчәккә күмелгән йортлар бар. Матур. Сокланып карап торырлык. Шундый гүзәллек тудыру өчен вакытларын, көчләрен кызганмаганнар икән, димәк, йорт хуҗалары шуннан тәм таба, – дип сүзгә кушыла Рәмзия Шәриповна. – Халык та хәзер матурлыкка омтыла. Күптән түгел Свердлов урамында яшәүчеләр уртак көч белән балалар мәйданчыгын төзекләндерде. Яше–карты, баласы–чагасы–бөтен кеше чыкты. Чишмәләр янын, паркларны чистартуга да зур өлеш кертелде.
Территориаль җәмәгатьчелек үзидарәләре халыкны социаль яклау буенча да зур эш башкаралар. Үз территорияләрендәге бер генә караучысыз калган өлкән яшьтәге кешене дә, күп балалы гаиләне дә игътибарсыз калдырмыйлар.
– Һәр йортка кереп танышып йөрүнең уңай яклары да бар. Урамда күреп, исәнләшеп киткәндә генә кешенең уй–кичерешләрен белеп бетереп булмый. Ә монда алар ачылып китә, шатлыклары, кайгы–хәсрәтләре белән уртаклаша, ярдәм сорап мөрәҗәгать итә. Эш дәверендә шуны аңладык, кешегә иң беренче чиратта игътибар кирәк икән. Бигрәк тә өлкәннәргә. Ашау–эчү дә хәзер проблема түгел, кием–салым да җитәрлек. Ә менә игътибар җитеп бетми, – ди Ибраһим Сабиров.
– Ә сез нинди ярдәм күрсәтә аласыз?
– Аларга ярдәм итүләрен сорап ТҖҮ исеменнән җитәкчеләр янына гозер белән керәбез. Алар үзләре я җитәкчеләр янына йөрүдән уңайсызлана, я кая, кем янына керәсен белми. Мәсәлән, өлкәннәр көне якынлаша. Оешмалары таркалган кешеләр бар. Гомер буе эшләп, искә алучы да юклыктан зарланалар. Халыкны социаль яклау бүлегенә кереп, аларны бүләк бирүчеләр исемлегенә кертәбез. Оешмаларга барып, юбилейларын билгеләп үтүләрен сорыйбыз. Быел Роза Абдуллина белән Миннехан Зиннатовның юбилейларын үткәрдек. Ялгыз әбиләргә караучылар табарга ярдәм итәбез. Дөрес, түләүле, әмма аларны табасы да бар бит. Бәйрәмнәрдә өйләргә йөреп бүләкләр өләшү, кичәләргә чакыру, алтын юбилярларны табу, Яңа елда Кыш бабай күчтәнәчләре тарату, төрле рәсми кәгазьләр өләшү, хәтта вафат булган ялгыз әби–бабайларны җирләүне оештыруга да үз өлешебезне кертәбез, – ди Рәмзия Хәмидуллина.
Нәсимә Гарифуллина Питомникта ел да урам бәйрәмнәре оештыра. Ибраһим Сабиров башлап йөрүчеләрнең берсе. Сабантуйга бүләкләр җыйдылар, Рәмзия Хәмидуллина әйдәп йөрүчеләрдән иде. Энергетиклар, Кызыл Бистә урамнарында ел да корбан бәйрәмендә урамда аш үткәрү традициягә әверелде. Быел аларга Свердлов урамы да кушылырга уйлый. Территориаль җәмәгатьчелек үзидарәләре җитәкчеләре монда да читтә калмый. ТАССРның 90 еллыгы урамындагы (“Көнбатыш” ТҖҮсе) Халыкара күршеләр көне билгеләп үтелде. Бу да ТҖҮ җитәкчесе тырышлыгыгыннан башка узмады. Болар бар да күзгә күренми торган вак эшләр сыман, әмма шул ук вакытта халык ихтыяҗ- ларын канәгатьләндерү максатыннан башкарылуы белән дәрәҗәле дә.
Гөлсинә Зәкиева