Депутат белән очрашу

Депутат белән очрашу
14 августта Татарстан Республикасы Дәүләт Советы депутаты Рауль Рәхмәтуллин Урта Курсада һәм Түбән Мәтәскәдә шушы җирлекләр халкы белән очрашты.
Башта Урта Курса авыл җирлеге башлыгы Рәмзия Вафина авыл халкы тормышы, башкарылган эшләр, дәүләт программасы нигезендә төзелгән торак йортлар, социаль объектлар, терлек асрау- чылар өчен тудырылган уңайлыклар турында сөйләде, үзара салым акчасының нинди максатларда тотылуы белән таныштырды.
Иске Кырлай авыл җирлеге башлыгы Фәргать Сираҗетдинов та халыкны иң кызыксындырган мәсьәлә–авыл җирлегенә кергән һәр сигез авылда үзара салым акчасына башкарылган эшләрне санап үтте.
– Безнең авыл җирлеге территориясендә рес- публика президент программалары нигезендә дә быел күп эшләр алып барыла. Иске Иябашта клуб төзелде, шунда ук юл, Мөндештә авария хәлендәге бинадан күчү өчен торак йорт, балалар бакчасы, Түбән Мәтәскәдә күпер салына, – диде Фәргать Сираҗетдинов.
– Дәүләт программалары нигезендә район күләмендә дә саллы эш алып барылды. Алар бар да Татарстан Республикасы җитәкчелегенең безнең районга карата уңай мөнәсәбәттә булуын күрсәтә, – диде район башкарма комитеты җитәкчесе урынбасары Рамил Гарифҗанов.
Дөрес, халыкны борчыган проблемалар да бар. Иң беренче чиратта авыллар эчендәге юллар. Түбән Мәтәскәдә бу турыда сорау да булды. Казиле авылына юл булмавы, шуның нәтиҗәсендә балаларның укырга җәяү йөрүләре, шул ук авылда клуб юклыгы турында җиткерелде.
– Тормыш бик яхшы, әмма күңел канәгать түгел. Чөнки тормыш яхшырган саен тагын да яхшырак яшисе килә. Юллар төзү буенча да программа гамәлдә. Акрынлап бар да эшләнер. Республика лидеры Рөстәм Миңнехановның төп максаты – халыкның тормыш дәрәҗәсен үстерү, – диде Рауль Рәхмәтуллин.
Депутат республикада башкарылган эшләр, рес- публика президент программаларының үтәлеше турында сөйләде.
– Очрашу эшлекле һәм яхшы узды. Сораулар да булды. Ә сораулар булу халыкның бүгенге тормышка битараф булмавын исбатлый. Сораулар бар, әмма мөмкинлекләр чиклерәк. Ләкин бер проблема да үтәлмәслек түгел, – диде соңыннан безгә Рауль Рәхмәтуллин. – Шуңа сайлауларда яхшылап барын да уйлап тавыш бирергә кирәк. Ә сайлауларда катнашу ул һәр кешенең гражданлык бурычы.
Гөлсинә Зәкиева