Югалтуларсыз булмастыр, әмма...

Югалтуларсыз булмастыр, әмма...
Арчадан Акчишмә авылына барып җиткәнче берничә тапкыр яңгыр явып үтте. Августта уттай урак өсте булырга тиеш тә бит, әмма нәкъ көзге һава, килә ява, килә ява ияләнде бер болыт. Аптыраган халык, бәлки август белән сентябрь урыннарын алышканнардыр, дип юрап куя.
Ингел Сәйфетдинов Акчишмәгә Ашытбаштан килеп эшли. “Быел эшли алырмы дип борчылган идем, аларның гаиләсе бик авыр хәлдә калган иде бит”, — ди хуҗалык җитәкчесе Газинур Сафин.
Ашытбашта язгы якта өч хуҗалык янды, Сәйфетдиновлар бөтенләй бернәрсәсез калган иде. “Йорт сатып алдык, әкренләп бар да җайлана”, — ди Ингел.
Хуҗалык җитәкчесе яңгыр шушы басуда гына яумады дип куанып торганда болытлар монда да килеп җитте.
— Хәзер үтеп китә, бераздан җилли ул, — ди Ингел Сәйфетдинов.
Әнә шулай күккә карап эш итәргә туры килә быелгы уракта. “Мәрҗани” ширкәтенең юл буендагы басуында да комбайннар тезелешеп яңгыр үткәнне көтеп тора. Район яшьләр эшләре, спорт һәм туризм бүлеге җитәкчесе Зиннур Сәгыйтов әлеге хуҗалыкның яшь комбайнчысы Илфат Хәбибуллинга бүләк алып килгән иде. Илфат югары белемле белгеч, студент вакытта ук трактор ясап бөтен республикага танылган иде ул. Һәр елны урак өстендә комбайнга утыра, әнә шулай бүләк алырлык, үрнәк булырлык итеп эшли.
“Аю” ширкәтеннән бүләккә лаек булган Фәнил Мөхәммәтшин да хуҗалыкның инженеры булып чыкты.
Узган атнада урып–җыю буенча хуҗалыклар арасында иң югары күрсәткечкә “Татарстан” ширкәте иреште. Аның җитәкчесе Рүзәл Мәрдановка район җитәкчесенең Рәхмәт хаты һәм акчалата бүләк тапшырылды.
Бер атна эчендә игеннәрнең һәр гектарыннан уртача 46,2 центнер уңыш җыеп алган “Кырлай” ширкәте баш агрономы Данил Шәяхмәтов, комбайннар иң югары җитештерүчәнлеккә ирешкән өчен “Татарстан” ширкәте баш инженеры Альбирт Фәрухов, өч көндә иң күп ашлык суктырган өчен “Кырлай” ширкәте комбайнчылары Нияз Сибаев, Расих Галимҗанов, “Арча” ширкәте комбайнчысы Азат Фәттахов шундый бүләкләргә лаек булдылар.
Шундый кызыксындыру чаралары көзге чәчү һәм туфрак эшкәртү буенча да кулланылачак.
18 августка район хуҗалыкларында 26169 гектардагы игеннәр (52,9 процент) урып–җыелды. “Курса МТСы” ширкәтендә ул — 73,4, “Татарстан” ширкәтендә — 71,7, “Ватан”да — 71,1 процент.
Иң түбән күрсәткеч Сафиуллин хуҗалыгында — 18,6 процент кына.
Район буенча бер гектардан уртача уңыш — 27,8 центнер. “Кырлай”, “Ак барс” агрокомплексы” ширкәтләрендә 43–42,4 центнер чыга. Иң түбән уңыш “Арча”, “Мәрҗани” ширкәтләрендә — 15,6–18 центнер.
“Ватан” ширкәте 53 процент күләмдә сабан культуралары орлыклары салып куйды. “Татарстан”, “Аю”, “Кырлай”, “Игенче”, “Северный”, “Мәрҗани” ширкәтләрендә шактый орлык салынды. Алты хуҗалыкта бу эшкә керешмәделәр әле.
Кырдагысы түгел, амбардагысы икмәк, ди халык мәкале. Басудагы югалтулар соңрак коелган бөртекләр тишелеп чыккач күренәчәк. Ә менә юл буйларында коелган ашлыкны күрми калу мөмкин түгел. Ерак барасы юк — Зур Бирәзә авылы уртасындагы юл буйларына игътибар итегез әле!
Район буенча 5132 гектарда (26200 гектар чәчәсе бар) көзге культуралар чәчелде. Шуның 1227 гектары — “Мәрҗани”, 1038 гектары — “Татарстан”, 1000 гектары “Ак барс” агрокомплексы” ширкәтләрендә.
Ильяс Фәттахов