Гер күтәрүчеләр ярышты

Гер күтәрүчеләр ярышты
Спортка соңгы вакытта игътибар аеруча нык артты. Бер генә түгел, күп төренә. Футбол буенча да очрашулар булып тора, йөгерешчеләр дә даими рәвештә җитезлекләрен барлый, хоккей спортын сөючеләр күбәеп китте. Һәрберсен әйтеп бетерерлек тә түгел.
– Танылган спорт төрләре (волейбол, баскетбол, футбол, хоккей, чаңгыда шуу, гер күтәрү һәм башкалар) буенча районда спорт федерацияләре булдырылды. Барлыгы 15 федерация төзелде, – ди район башкарма комитеты җитәкчесе урынбасары Рамил Гарифҗанов. – Максаты – яшьләрне спортка тарту, физик яктан чыныктыру. Җитәкчеләре итеп кайсы спорт төрен якын итүен, үзе яки балалары шуның белән шөгыльләнүен исәпкә алып, шулай ук ярышлар үткәрүдә финанс яктан ярдәм күрсәтә алырдай җитәкчеләр билгеләнде. Менә әле җәйге каникул чорларында да мәктәп укучылары арасында футбол ярышларын башлап җибәрдек. Алар башта зоналарда үтте, ә финал өлеше Арчада булды. Урта махсус уку йортлары студентлары арасында да ярышлар оештыру күздә тотыла.
Спорт федерацияләре үз эшләрен башлап та җибәргән инде. Шушмабаш урта мәктәбендә гер спорты буенча ярышлар үтте. Аны райондагы гер спорты федерациясе җитәкчесе Рөстәм Гомәров оештырган. Рөстәм Кәлимуллович үзе дә спорт белән бик теләп шөгыльләнә. ГТО нормаларын да беренчеләрдән булып тапшырган.
– Хәрби училищеда укыганда гер спортын якын иттем. Мастерлыкка кандидат та булдым, – ди Рөстәм Гомәров.
Бу көнне дә ул яшьләргә үрнәк күрсәтеп, 32 тапкыр гер күтәрде. Җиңүчеләргә яхшы бүләкләр дә әзерләгән иде. Беренче урынны яулаган Алимас Кәримовка, икенче урындагы Булат Әкбәровка, өченче урындагы Айнур Хәйруллинга бүләкләр тапшырылды.
– Гер күтәрү ярышлары гына түгел, укучылар өчен чын бәйрәм ясады Арча ЗУЭСы, – ди мәктәп директоры Рәзилә Шәймәрданова. – Профсоюз комитеты җитәкчесе Фирая Вәлиева төрле уеннар оештырды, җиңүчеләргә бүләкләр өләште. Дискотекада бар да рәхәтләнеп биеде.
– Шушмабаш минем туган авылым. Ә Шушмабаш урта мәктәбе райондагы иң алдынгы уку йортларының берсе, – диде ЗУЭС җитәкчесе Рөстәм Гомәров. – Биредә без зур тизлектә эшләүче мобиль интернет манарасы да куйдык. Хәзер спорт ярышлары вакытында бәйрәм оештырып, балаларның күңелләрен күрергә булдык.
Ул көнне биредә футбол буенча зона ярышлары да булды. Анда шул зонага караган Носы, Хәсәншәех, Шушмабаш, Апаз мәктәпләре укучылары очрашты.
Гөлсинә Зәкиева