Җырлы сәфәр

Җырлы сәфәр
Арча мәдәният идарәсенең автоклуб хезмәте ел әйләнәсе авыл халкы өчен агитбригадалар оештырып җыр–моңнарын бүләк итеп йөри.
Агитбригада үзешчәннәре урып–җыю чорындагы концертларын башлап җибәрде һәм “Курса МТС”ы ширкәтенең Түбән Курса һәм “Ак Барс” агрокомплексы” ширкәтенең Сикертән бригадасы ындыр табагында эшләүчеләр белән очрашты.
Узган ел урып-жыю чорында авыл хужалыгы хезмәтчәннәренә 8 тапкыр концерт куйган агитбригадачылар быел ул санны дистәгә җиткерергә җыена.
Түбән Курсалылар соңгы елларда агитбригада үзешчәннәре белән еш очрашып торса да, аларның һәр килүе биредә бәйрәм. “Шундый матур концерт куйганнары өчен рәхмәт”, — ди ындыр табагы мөдире Фәнзия Сабирҗанова. — Замана алга киткән саен кул хезмәте дә азая. Шуңа күрә хәзер ындыр табакларында да элеккегечә кеше күп түгел. Әйтик, безгә смена саен 4–5 кеше җитә. Иртәдән кичкә кадәр ширкәт эшчеләре килә, төш вакытында һәм кич 2–3 сәгатькә аларны мәктәп укучылары алмаштыра. Ел саен 6 машинист һәм ындыр табагының даими шоферы эшли. Шофер Марат Бакировның хезмәтен аерым мактап үтәсе килә”.
Сикертәнлеләрнең агитбригада моңнарын шактый еллардан соң беренче ишетүләре. “Бүген иртән генә, элек агитбригадалар бар иде, шау-гөр итеп ял биреп китәләр иде, дип, яшьләргә аңлатып, искә алып торган идем. Махсус заказ белән чакырып китергән кебек булды бу, зур рәхмәт”, — дип эшчеләр исеменнән куанычын белдерде 10 ел ындыр табагында киптерү агрегаты операторы булып эшләүче Илһам Мәһдиев. Сикертәнлеләр арыш эшкәртә, сатуга әзерлиләр, басуга чәчүгә чыгаралар. Ындыр табагында 4 механик эшли. Шофер Радик Әсхәтовны ындыр табагы, склад мөдире Алсу Байморатова үзе белеп эшли, аңа әйтәсе дә юк, дип мактады. Алсу ханымның тормыш иптәше Фәрит Байморатов та авыл хуҗалыгында иң кирәкле һөнәр ияләренең берсе — 12 ел инде ашлык агулауда икән. Хатын-кызлар, мәктәп укучылары, укытучылар, ширкәт эшчеләре намус белән бергәләп эшләгәндә, кайткан ашлык вакытында складларга урнашып бара. Үзешчәннәр куйган концерт аларга илһам бирде, күңелләренә шифа өстәде.
Арча мәдәният идарәсенең автоклубын 15 елдан артык Расих Галимҗанов җитәкли. “Автоклубның эшчәнлеге ел буе дәвам итә, язын һәм урып-җыю чорында авыл хезмәтчәннәре белән очрашсак, кыш көне авылларга концертлар белән чыгабыз. Агитбригада составында мәдәният хезмәткәрләре дә, һәвәскәр үзешчәннәр дә бар”, – ди ул. Җырчы, җирле шагыйрә Факия Шәрәфетдинова агитбригада составында 1975 елдан бирле йөри. Районның Әтнә районы белән бергә чакларын искә төшереп: “Ул елларда берәр атнага чыгып китеп, авылдан авылга кунып йөри идек”, — дип сагынып искә ала.
Хәзер машиналарда җилдереп барып кайтылса да, авыл халкының күңелен күрү, аларның яратып тыңлап утырулары, рәхмәтләре җырчыларга канат куя. Юлда кайтканда инде алар бу якларга киләсе елга тагын килеп чыгачак- ларын күңелләренә сала. Кунакчыл, ачык йөз белән каршы алган җирне кем яратмас?!
Агитбригаданың җыр–моңлы сәфәре дәвам итә.
Розалия Зиннәтова