Мәктәп аларны көтә

Мәктәп аларны көтә
Илебездә 2007 елда башланып киткән әлеге акция ярдәмендә никадәр бала бәхетле мизгелләр кичерде, үзенең яшьтәшләре белән бер дәрәҗәдә булуына куанды. Бүгенге көндә дә дәвам итә ул, киләчәктә тагын бик күп әти–әни, балалар рәхмәтле булыр аңа.
“Мәктәпкә әзерләнергә булыш” акциясендә районыбыз территориясендә урнашкан оешма җитәкчеләре, шәхси эшмәкәрләр бик теләп катнаша. Баланың йөзендәге шатлык очкыннарын күрүдән дә рәхәт мизгел бармы соң! Районыбызда балаларга мәктәп әсбаплары тутырылган букчалар тапшыру 8 августта башланып киткән иде, кичә соңгылары тапшырылды. Тантаналы рәвештә оештырылган бәйрәмдә быел тәүге тапкыр мәктәп бусагасын атлап керүче 183 бала берсеннән–берсе матур, затлы букчаларга ия булды. Районда бүләккә шатланучы алар гына да түгел — 46 авыр хәлдәге һәм 12 күп балалы гаиләләрдә тәрбияләнүче 1 нчедән 11 нче сыйныфка кадәрге балалар да өлешсез калмады — аларга мәктәп кирәк–яраклары өләшенде. Мәктәпкә барыр алдыннан саный китсәң, алары гына да шактый суммага җыела бит. Әнә, быел мәктәпкә керүче Азат Сафинның әнисе — 3 бала анасы Миләүшә ханым да шулай ди. “Өч баланы мәктәпкә әзерли башлагач, ничек җиткерербез, дип куркып калдык. Тик шул көннәрдә мәктәптән шалтыратып, улыбызны букча алу тантанасына килергә чакырдылар. Мәктәпкә баруның башы ук шундый игелекле вакыйга белән башланып киткәч, киләчәге дә яхшы булыр. Бу чараны оештыручыларга, анда катнашучы оешмаларга, эшмәкәрләргә, барлык әти–әниләр исеменнән зур рәхмәт. Үзләренең кирәкле булуларын, кадерле икәнлекләрен тойган балаларыбыз илебезнең ышанычлы киләчәге булыр дип өметләнбез”, – диде ул Арчаның 1 нче мәктәбендә узган тантанада. Биредә Арчаның 1, 3 номерлы мәктәпләренә һәм 5 нче гимназиясенә баручы балалар җыелган иде.
Быел акциядә 45 оешма катнашкан. Ел саен әлеге хәйрия акциясендә актив катнашучы “Арча МСО”сы, Арча педагогика көллияте, Арча агросәнәгать көллияте, “Жилкомбытсервис”, “Теплосервис”, “Арча КСМ”ы, “Энергосервис”, “Мастер дома”, “Тайд–Фойл”, “Айракс”, “Металл”, “Арскпласт”, Арча сөт комбинаты, шәхси эшмәкәрләр А.Әмиров, И.Минхәиров, Р.Фәйзрахманов, И.Хәкимов һ.б. үрнәгендә исемлеккә яңалар өстәлә бара. Ә ЗУЭС турында аерым әйтәсе килә. Ел да дистәләп балага бүләк бирә бу оешма. Тагын шунысы игътибарга лаек — һәр елны үз хезмәткәрләренең беренче сыйныфка барачак балаларына акчалата ярдәм күрсәтә.
Беренче сыйныфка керүчеләр түземсезләнеп Белем бәйрәме җиткәнне көтә. Әлеге букчалар һәм эчендәге уку кирәк–ярак- лары аларга белем иленең серләренә тиз төшенергә, белем дәрьясына курыкмыйча кереп яхшы нәтиҗәләргә ирешергә ярдәм итсен иде.
Розалия Зиннәтова