Һәммәсе дә халык өчен

Һәммәсе дә халык өчен
Быел Арча шәһәрендә Җиңүнең 70 еллыгы паркы, Г. Тукай исемендәге сквер төзелә, тимер юл вокзалы янындагы сквер үзгәртеп корылды.
14 августта Татарстан Лидеры Рөстәм Миңнеханов Түбән Камада яңартылган паркны һәм Г. Тукай исемендәге китапханәне ачты.
Габдулла Тукай исемендәге уку һәм ял паркын Татарстан Президенты Рөстәм Миңнеханов башлап җибәргән Парклар һәм скверлар елы кысаларында үзгәртеп кордылар. Программа кысаларында Татарстанда барысы 143 заманча парк һәм сквер (75е яңадан төзеләчәк, 68ендә нык- лап төзекләндерү үткәрелә) барлыкка киләчәк.
2015 елда “Парклар һәм скверлар” программасын Татарстан Респуб- ликасы бюджетыннан финанслауның гомүми күләме 1 млрд. сум тәшкил итә.
Республика Лидеры Рөстәм Миңнеханов кушуы буенча барлык проектлар республика районнарында яшәүчеләр белән тикшерү үтте.
Арча районында Парклар һәм скверлар елы кысаларында Арча шәһәрендә Җиңүнең 70 еллыгы паркы, Г. Тукай исемендәге сквер төзелә, тимер юл вокзалы каршындагы сквер үзгәртеп корылды.
— Әлеге эшләрне башкару өчен республика бюджетыннан 13 млн. 566 мең 930 сум акча бүлеп бирелде, — ди район башкарма комитетының шәһәр төзелеше һәм архитектура секторы мөдире Марат Гәрәев. — Билгеле, бу акча гына җитми, әлеге игелекле эшләргә район кешеләре, предприятие- ләр дә үз өлешләрен кертәләр.
Хәзерге вакытта Җиңүнең 70 еллыгы паркында юллар салынды, койма белән әйләндереп алынды. Чәчәклекләр һәм клумбалар ясалды, кече архитектура формалары, эскәмияләр, урналар куелды. Әлеге паркта 4 берәмлек хәрби техника үз урыннарын алды. Биредә балалар спорт мәйданчыкларын эшләп бетерәсе, истәлекле билгеләр һәм монументлар куясы, фонтанны монтажлыйсы калды.
Габдулла Тукай исемендәге скверның территориясен планлаштыру, килү юлларын асфальтлау эшләре башкарылды.
Тимер юл вокзалы каршындагы скверны үзгәртеп кору эшләре төгәлләнде.
2015 елда Арча районында парклар һәм скверлар төзү, үзгәртеп кору буенча программа эшләнде. Югарыда әйтеп үтелгән парк һәм скверлардан тыш, Арча шәһәрендәге яшел зоналар предприятие һәм оешмаларга беркетелде. Аларда да төзекләндерү, чистарту эшләре башкарылды. Безнең редакция коллективы да күп еллар инде, Шаляпин урамындагы балалар мәйданчыгына шефлык итә.