Алдыбызда зур бурычлар тора

Алдыбызда зур бурычлар тора
Гомуми урта белем бирүнең яңа буын белем стандартларына күчү чорында укытучылар алдында җаваплы һәм җитди бурычлар тора.
Әлбәттә, аларның иң беренчесе – татар теле һәм әдәбиятын бүген инде 5нче сыйныфтан алып әлеге стандарт таләпләреннән чыгып укыту. Сүз дә юк, без укытучыларга тиешле ярдәмне күрсәтеп торачакбыз. Укытучыларның 87 проценты шушы юнәлештәге курсларда белем алып кайтты.
Шулай да барлык татар мәктәпләрендә татар балалары туган телдә белем алуга карамастан, туган телдә белем алу район буенча 63,91 процент. Бу проблема шәһәр мәктәп- ләрендә татар балаларының рус сыйныфларында укуы белән бәйле. Аны хәл итү өчен укучыларны төркемнәргә бүлгәндә, татар баласының татар төркемендә белем алуын мәҗбүри итеп куярга кирәк, шулай ук район үзәгендә урнашкан мәктәпләрдә татар сыйныфлары ачу да татар телен үстерүнең бер юлы булып тора.
Яңа уку елында балалар бакчаларында һәм барлык рус телендә белем бирүче мәктәпләрдә үз телебезне камил өйрәтүне, балаларга татар телендә тәрбия бирүне, милли үзаңга көчле тәэсир ясый торган сыйныфтан тыш чаралар системасы булдыруны үзебезгә бурыч итеп куярга тиешбез. Әлеге максатларга бары тик балалар бакчалары һәм мәктәп җитәкчеләре чараларны ике дәүләт телендә үткәрүне таләп итеп куйганда, үзләре балаларны саф татар телендә сәламләгәндә генә ирешергә мөмкин. Тормышта үз урыннарын табарлык егетләр-кызлар үстерәбез дибез икән, баланы бакчадан ук үз ана телендә аралашырга, саф татар телендә җавап бирергә өйрәтергә һәм күнектерергә кирәк.
Район мәктәпләре сәләтле балаларны ачыклау һәм кызыксындыру буенча да уңышлы эшләп килә. Шуңа карамастан, моны камилләштерергә, сәләтле укучылар белән эшләүне район кысаларында гына калдырмыйча, республикада, Россия төбәкләрендәге югары уку йортлары белән элемтәләр оештырып, укучыларны төрле чараларда, конкурс-ярышларда актив катнаштыруны максат итеп куярга кирәк.
Татарстан Республикасы Мәгариф һәм фән министрлыгы тарафыннан муниципалитетларның һәм белем бирү оешмаларының тәрбия юнәлешендәге эшчәнлегенә бәяләү үткәрелде. Безгә мәктәп- ләрдә тәрбия эшен тагын да көчәйтергә, мәктәп укучысының сәламәтлеген саклауга, ныгытуга юнәлдерелгән массакүләм спорт чараларының һәм профилактикалау проектларының нәтиҗәлелеген яхшыртырга кирәк. Безнең районыбызда моның өчен бөтен шартлар да тудырылган.
Гомумән алганда, мәгариф системасы эшчәнлеге уңай үзгәрешләр кичерә. Шул ук вакытта проблемалар да юк түгел. Белем бирү сыйфаты югары дәрәҗәгә күтәрелсен өчен безгә зур көч куярга кирәк.
Укытучыларны белем бәйрәме һәм яңа уку елы башлану белән котлыйм, аларга эшләрендә иҗади уңышлар, нык сәламәтлек, гаилә иминлеге һәм бәхете телим. Фикер һәм талант чишмәгез беркайчан да саекмасын.
Зөлфәт Дәүләтбаев,
район мәгариф идарәсе җитәкчесе

Татарстан Республикасы Мәгариф һәм фән министрлыгының “Мәгърифәттәге казанышлары өчен” күкрәк билгесе белән бүләкләнүчеләр:
– Абдуллин Марс Миннехан улы – Сеҗе төп гомумбелем мәктәбе директоры;
– Гыйлаҗиева Лилия Фатыйх кызы – Арчаның бишенче гимназиясе татар теле һәм әдәбияты укытучысы;
– Сәхбиев Таһир Зөлфәт улы – Арчаның Валентин Ежков исемендәге беренче урта гомумбелем мәктәбе физкультура укытучысы;
Сафиуллин Илшат Рашат улы – мәгариф идарәсе методисты;
– Яхин Айдар Үзбәк улы – Укучылар сараеның өстәмә белем бирү педагогы.
Татарстан Республикасы Мәгариф һәм фән министрлыгы мактау грамотасы белән бүләкләнүчеләр:
– Абдульманова Миләүшә Азат кызы – Арча педагогика көллиятенең музыка укытучысы;
– Гарифуллина Илисә Равил кызы – Иске Чуриле урта гомумбелем мәктәбенең рус теле һәм әдәбияты укытучысы;
– Галәветдинова Ләлә Фәрит кызы – Шушмабаш урта гомумбелем мәктәбенең рус теле һәм әдәбияты укытучысы;
– Гаянова Эльмира Нариман кызы – Арча агросәнәгать көллияте укытучысы;
– Гафурова Гөлнара Марс кызы – Арча агросәнәгать көллияте укытучысы;
– Исхакова Фәния Шәрип кызы – Казанбаш төп гомумбелем мәктәбенең татар теле һәм әдәбияты укытучысы;
– Камалиева Мәүҗидә Миннәхмәт кызы – Ташкичү төп гомумбелем мәктәбенең башлангыч сыйныфлар укытучысы;
– Кондратенко Резеда Наил кызы – Арчаның икенче урта гомумбелем мәктәбе география укытучысы;
– Косарева Любовь Трофимовна – Арчаның беренче балалар бакчасы тәрбиячесе;
– Низамова Рузалия Гаяз кызы – Арчаның сигезенче балалар бакчасы өлкән тәрбиячесе;
– Төхвәтуллина Ләйлә Рәүф кызы – Яңа Кенәр урта гомумбелем мәктәбенең математика укытучысы;
– Төхвәтуллина Әлфия Госман кызы – Арча педагогика көллиятенең татар теле укытучысы;
– Фәхриева Эльвира Илгизәр кызы – Арча педагогика көллиятенең музыка укытучысы;
– Шиһапова Клара Хадит кызы – Арчаның бишенче балалар бакчасы тәрбиячесе;
– Шәймәрданова Тәнзилә Идрис кызы – Лесхоз урта гомумбелем мәктәбе башлангыч сыйныфлар укытучысы.
Татарстан Республикасы Мәгариф һәм фән министрлыгының Рәхмәт хаты белән бүләкләнүчеләр:
– Мостафина Эльвира Габделхәй кызы – Арча педагогика көллиятенең инглиз теле укытучысы;
– Салихова Ләйлә Илфат кызы – Арча педагогика көллиятенең музыка укытучысы.