Башкаларга үрнәк

Башкаларга үрнәк
“АСПК” акционерлык җәмгыяте базасында Арча муниципаль районының хезмәтне саклау буенча координацион советы күчмә утырышы булды.
– Монда җыелуның сәбәбе–оешманың хезмәтне саклау өлкәсендә үңай тәҗрибәсен өйрәнү. Биредә янгын куркынычсызлыгы буенча да барлык кирәкле чаралар бар, киенү–чишенү бүлмәләре, душ кабиналары, санитар–көнкүреш җиһазлары – бар да тәртиптә, – диде район башкарма комитетының хезмәтне саклау буенча белгече Муллахмәт Әскәров.
Утырышта катнашучылар “АСПК” акционерлык җәмгыяте территориясен карап чыктылар, завод белән таныштылар. Җитештерү цехы җитәкчесе Рәшит Яруллин хезмәтне саклау буенча нинди эшләр башкарылуы турында сөйләде.
– Бездә куркынычсызлык техникасы буенча аерым бүлмә бар. Шул ук актлар залы да, уку бүлмәсе дә. Эшкә керүчеләргә инструктаж да биредә үткәрелә. Бөтен материаллар стенадагы стендта, – диде “АСПК” акционерлык җәмгыяте җитәкчесе Вазыйх Бикмуллин. – Куркынычсызлык техникасы буенча бездә бик күп эш башкарыла. Җәмгыятьтә барлыгы 270 кеше эшли. Эшчеләр һәм хезмәткәрләр өчен без барлык мөмкинлекләрне дә тудырырга тырышабыз.
Яхшы, уңайлы итеп, заман таләпләренә туры китереп эшләнгән киенү-чишенү бүлмәләре, душ кабиналары, санитар-көнкүреш объектлары, чисталык, хәтта территориядәге асфальтны һәрвакыт чиста тоту өчен махсус техника булуы, тәртип, уңай микроклимат, куркынычсызлык техникасы буенча барлык кирәкле чаралар, видеокүзәтү – бар да шуны раслый. Хезмәтне саклау буенча төбәкара ассоциация рәисе Фәнил Габдрахманов, Татарстан Республикасы Хезмәт, мәшгульлек һәм социаль яклау министрлыгының бүлек җитәкчесе Татьяна Манжосова “АСПК” акционерлык җәмгыятендә, гомумән, Арча районында хезмәтне саклау, техника куркынычсызлыгы таләпләре үтәлешенә уңай бәя бирделәр.
– Бу юнәлештә эш предприятиедә бик яхшы оештырылган. Шуңа биредә бәхетсезлек очракларының булганы юк, – диде Ф.Габдрахманов.– Арча районы башкарма комитетында хезмәтне саклау буенча махсус белгеч бар. Бу башка районнар өчен генә түгел, кайбер зур шәһәрләр өчен дә үрнәк.
Ул хезмәтне саклауны яхшырту буенча респуб- лика һәм район программалары эшләве, бюджет оешмаларында бу юнәлештә укулар, хәтта күчмә укулар оештырырга кирәклеге турында әйтте, ассоциация турында сөйләде, “Иң яхшы хезмәтне саклау белгече” дигән интернет–бәйгедә катнашырга чакырды.
“АСПК” акционерлык җәмгыятенең хезмәтне саклау хезмәте җитәкчесе Альберт Фәйзрахманов үзенең эш тәҗрибәсе белән таныштырды, Татьяна Манжосова эшлекле киңәшләрен бирде, район вәкилләре өчен бушлай семинарлар оештырылуы турында әйтте. Шулай ук утырышта “Барыбыз бергә хезмәтне саклау профилактикасы культурасын күтәрик” девизы белән 25 майдан 1 августка кадәр барган “Хезмәтне саклау көне”нә багышланган чарага да нәтиҗә ясалды.
Утырышта район башкарма комитеты җитәкчесе урынбасары Рамил Гарифҗанов катнашты.
Гөлсинә Зиннәтова