Киләчәк балаларыбыз кулында

Киләчәк балаларыбыз кулында
26 августта үткән мәгариф хезмәткәрләренең август киңәшмәсендә район җитәкчесе Илшат Нуриев тарафыннан әйтелгән әлеге сүзләр педагоглар башкарган эшнең бөтен җаваплылыгын ачып сала.
Дөрестән дә, бүген укучыларга нинди тәрбия һәм белем бирсәк, киләчәгебез дә шундый булачак бит. Быел Бөгелмәдә узган республика август киңәшмәсендә дә республика лидеры Рөстәм Миңнеханов укучыларда эшче һөнәрләренә мөнәсәбәтне үзгәртү юнәлешендә тәрбия алып бару таләбен юкка гына куймады. Юкса, югары белем турында диплом алып та, төпле һөнәре дә, эше дә булмаган буын үсәргә мөмкин. Мәктәпне тәмамлаучы балаларыбыз әти-әни кесәсе күтәрә алган уку йортын түгел, ә күңеле яткан, мәктәп елларында ук шул юнәлештә тирән белем алган, икътисад үсеше перспективаларына тәңгәл килгән һөнәр сайларга тиеш. Мәгариф системасы исә шушы максатны күздә тотып һәр балага сәләтен үстерү мөмкинлеге тудырырга бурычлы.
Район мәгариф идарәсе җитәкчесе Зөлфәт Дәүләтбаев Һәм аннан соң чыгыш ясаучыларның докладларыннан күренгәнчә, районда мәгариф учреждениеләренең матди-техник базасын ныгыту, аларны заманча җиһазлар белән баету, тиешле квалификацияле кадрлар белән тәэмин итү буенча гаять зур эш башкарыла. Моңа мисаллар бик күп. Мәгариф өлкәсенә бүген район бюджетының 65 проценты, ягъни 700 миллион сумга якын акча тотыла. Моннан тыш төрле бәйгеләрдә җиңү яулаган коллективлар һәм укытучылар грантлар рәвешендә республика бюджетыннан өстәмә акчалар да ала. Андый үрнәк, алдынгы мәктәпләр һәм педагоглар безнең районда да аз түгел. Ел саен республика президент программасы буенча районда берничә уку йорты ныклап төзекләндерелә, яңа мәктәпләр, балалар бакчалары төзелә. ( Бу турыда әлеге санда да укый аласыз.) Бу программалар киләсе елда да дәвам итәчәк. Арчада 500 урынга исәпләнгән яңа урта мәктәп төзү дә планлаштырыла.
Республикада кабул ителгән “Стратегия – 2030” программасын тормышка ашыруда да мәгариф өлкәсенә зур әһәмият бирелә. Бу турыда конференция кунагы, Мәгариф һәм фән министрлыгының бүлек җитәкчесе Венера Садыйкова бик тәфсилләп сөйләде.
— 2016 ел башыннан педагогларның хезмәт хаклары да укучыларының белем һәм тәрбия сыйфатыннан чыгып билгеләнәчәк, — диде ул. — Моның өчен министрлыкта район мәгариф идарәләре, мәктәп коллективлары һәм аерым укытучыларның эш нәтиҗәләрен бәяләүче күрсәткечләр системасы булдырылган.
Дөрес, район мәгариф системасының төрле юнәлештәге эш нәтиҗәләрен исәпкә алып төзелгән рейтинг әле дә бар. Район җитәкчесе Илшат Нуриев нәкъ менә шушы рейтингта район мәгарифе биләгән урыннардан, аның әлегә бу өлкәгә тотылган чыгымнарны, гаять зур игътибарны акламавыннан канәгатьсезлеген белдерде.
— Укыту сыйфаты буенча безнең район — 18, милли мәгариф буенча — 13, тәрбия эше буенча 30 урында. Бу саннар милләтебезнең “алтын баганаларын” – дистәләгән әдәбият, сәнгать әһелләрен, фән эшлеклеләрен, бөек Тукаебызны биргән Арчаны һич тә бизәми, — диде ул.
Илшат Габделфәртович үз чыгышында хәлне кичекмәстән төзәтү өчен һәр юнәлештә нинди чаралар күрергә кирәклегенә басым ясады. Математика, җәмгыять белеме, физика, биология, химия, инглиз теле, информатика буенча бердәм дәүләт имтиханнары нәтиҗәләре респуб- лика күрсәткечләреннән шактый түбән булуы бу фәннәрне укытуга игътибарны арттыруны, имтиханнарга әзерлек системасын тамырдан үзгәртүне таләп итә.
Районда сәләтле балалар белән эшләү программасы кабул ителде. Быел ачылачак Арчаның 3 мәктәбендә нәкъ менә шундый балаларны туплау, аларга милли рухта тәрбия һәм белем биреп, халкыбызның интеллектуаль элитасын булдыруга лаеклы өлеш кертүне күздә тота. Моның өчен Арча педагогика көллиятенең фәнни һәм иҗади потенциалын кулланып, районда “балалар бакчасы-башлангыч мәктәп-төп мәктәп-педагогика көллияте”н үз эченә алган мәгариф кластеры булдыру планлаштырыла.
Тәрбия эшләре дә укыту мәсьәләләре кебек үк алгы планда булырга тиеш. Аның нигезен хезмәт тәрбиясе тәшкил итә. Яшьләрдә авыл хуҗалыгы белән кызыксынуны арттыру өчен”гаилә-мәктәп-агросәнәгать көллияте-агрофирмалар” кластерын уңышлы эшләтеп җибәрү максатында, мәктәпләргә авыл хуҗалыгы техникасы да биреләчәк.
Районда балалар иҗатын үстерү, сәламәтлекләрен ныгыту, спорт белән шөгыльләнү өчен дә бөтен шартлар тудырылган. Бу юнәлештәге түгәрәкләрне җанландырып җибәрү, әле күптән түгел генә үзган балалар Сабантуе кебек киң масштаблы чаралар аша яшь буында милли үзаңны үстерү, “Аҗаган” кебек хәрби-патриотик уеннарны яңадан кайтару – киләсе уку елындагы бурычлар.
Гомумән алганда, район мәгарифе өлкәсендә укыту-тәрбия мәсьәләрен беренче планга кую, сәләтле балалар белән эшне системалаштыру, милли мәгарифне үстерүне җайга салу буенча әлеге киңәшмә бик файдалы булды.
Арча районы педагоглары алда торган бу катлаулы бурычларны хәл итәргә сәләтле. Конференция азагында дистәләгән укытучы, тәрбиячеләрнең бүләкләр алуы моңа дәлил. Алар белем һәм тәрбия биргән укучыларның халыкара, ил, Татарстан күләмендәге фән олимпиадалары, төрле бәйге-конкурсларда җиңеп чыгулары да зур ышаныч уята. Димәк, сәләтле балаларыбыз бик күп безнең. Аларны күрә һәм үстерә белергә генә кирәк!
Исрафил Насыйбуллин