Киләчәк өчен тавыш бирик

Киләчәк өчен тавыш бирик
Тиздән Татарстан Республикасы Президентын һәм җирле үзидарә органнарына сайлаулар була. Район сайлаучылары бу турыда нәрсә уйлый.
Яңа Кенәрдән Рашат Салихҗанов:
— Сайлауларга гаиләдән дүртебез дә барабыз, башкаларны да сайлауларда катнашырга һәм алдагы көнебез өчен тавыш бирергә өндим. Кем эшли — шул ашый. Менә әле хатынны да булышырга алып чыктым. Агач материалыннан тәрәзә, ишекләр эшлибез. Тормышымнан канәгать. Улыбыз Илнур техникум тәмамлап, читтән торып югары уку йортында укый, геодезист булып эшли, дөнья гизә. Кызыбыз Миләүшә укуын тәмамлап, шәфкать туташы булып эшли. Гаиләдә дүртәү без, әмма беребез дә эшсез, өйдә кул кушырып ятмый. Һәркемнең үзеннән тора, дип уйлыйм. Яшьтән армия хезмәте үттем. Әфганстан сугышында катнашып, аннан исән–сау кайттым. Илебез, республикам, район язмышына битараф кала алмыйм. Шуңа да минем өчен сайлаулар мөһим. Сайлаулардан соң яңа программалар булачагына ышанам. Әфганчыларның торак шартлары тагын да яхшырыр, дип уйлыйм.
Утар Атыдан Илсум Садыйков:
— Сайлауларга, әлбәттә, барабыз, башкаларны да сайлауларда катнашыр- га чакырам. Без бүгенге тормышны элеккеге белән чагыштыра алабыз. Без бит сугыш чоры балалары. Черек бәрәңгене, ачлыкны, юклыкны күргән буын. Ул еллар белән чагыштырганда бүгенге тормыш оҗмах. Нурания апагыз белән икебезгә пенсияне әйбәт алабыз. Кибеткә керсәң, җаның ни тели — бар да бар. Өстәлләрдә — ризык. Өебез җылы. Менә әле яңа гына 1 сентябрь бәйрәменнән кайттык. Рәхмәт коллективка, бер генә чарадан да калдырмыйлар, чәй эчертмичә җибәрмиләр. Мәктәптәге уңышларны күреп, укытучылар белән сөйләшеп, бергә эшләгән хезмәттәшләр белән күрешеп, балалар өчен куанып кайттык. Алга таба да тормышыбыз имин булсын, пенсияләр килеп торсын, авыр хезмәт юлы үтеп тә, аз пенсия алучыларның пенсиясе артсын иде.
Румия Надршина