Кыңгырау беренче дәрескә дәште

Кыңгырау беренче дәрескә дәште
Утар Аты мәктәбе дә ныклап төзекләндергәннән соң 1 сентябрь көнне үзенең ишекләрен ачты. Тантаналы линейка укучылар һәм укытучылар өчен шунысы белән дә истәлекле булды.
– 1 сентябрь, укытучылар, мәктәп кешене гомере буе озата бара. Киләчәктә ул кем генә булмасын, нинди урыннарны гына биләмәсен, тормышы туган мәктәбе бусагасыннан беренче тапкыр атлап керүдән башлана. Ә сез бүген нинди матур мәктәпкә аяк басасыз. 40 еллык тарихы булган белем йортын бүгенгедәй матур итеп саклагыз, яхшы билгеләренә генә укыгыз, – диде район башкарма комитеты җитәкчесе урынбасары Рамил Гарифҗанов һәм район җитәкчесе исеменнән мәктәпкә 50 мең сумлык сертификат тапшырды.
Белем бәйрәмен мәктәп директоры вазыйфаларын башкаручы Гөлназ Гыйниятуллина ачып җибәрде.
– Мәктәптә балалар иң күңелле вакытларын уздыра. 9 ел дәверендә сезгә белем алырга уңайлы булсын өчен нинди затлы бинабыз булды. Моның өчен республика, район җитәкчеләренә, “Арча КСМы” ширкәте төзүчеләренә зур рәхмәт. Бергәләп эшлик, бердәм булыйк, – диде ул укучылар һәм укытучылар коллективларына, ата-аналарга мөрәҗәгать итеп.
Бәйрәмне котлау сүзләре һәм изге теләкләр белән авыл җирлеге башлыгы Әхтәм Хәкимҗанов, мәгариф идарәсе җитәкчесенең тәрбия эшләре буенча урынбасары Миләүшә Шакирова, ветеран укытучылар дәвам итте. Миләүшә Шакирова олимпиадаларда уңыш- лар яулаган, алдынгы укучылар Алия Низамова, Сәгыйть Вәлиев, Әмир Сафинга Мактау грамоталары тапшырды.
– Мин бөтен гомеремне балаларга белем бирүгә багышладым. Аларның бүген шундый матур мәктәпкә аяк басуларына сөенеп туя алмыйм. Монда инде яхшы һәм бик яхшы билгеләренә генә укырга, тәрбияле балалар булып чыгарга, мәктәп данын югалтмаска кирәк. Уңышлар сезгә, укучылар. Хәерле сәгатьтә булсын, – диде барлык ветеран укытучылар исеменнән Илсум абый Садыйков.
Беренче сыйныфка укырга керүче өч укучыга белем иленә символик ачкыч, иң беренче китаплары – Әлифба, бүләкләр тапшырылды. Белем бәйрәме шигырьләр, җырлар белән дәвам итте.
Аннан укучыларны сыйныф бүлмәләренә беренче дәрескә чакырып кыңгырау чыңлады. Ул дәрес “Мин талантлы” дигән исем астында үтте һәм талантлы балаларны эзләү, барлауга багышланды.
Гөлсинә Зәкиева