Апаз мәктәбендә икеләтә бәйрәм

Апаз мәктәбендә икеләтә бәйрәм
Быелгы 1 сентябрь Апаз урта мәктәбе коллективы, анда укучы балалар, аларның ата-аналары өчен икеләтә бәйрәм булды. Ныклап төзекләндерелгәннән соң күз явын алырдай өр-яңа хәлгә килгән мәктәп каршы алды аларны.
— Мондый мәктәптә фәкать тырышып укырга гына кала. Бердәм дәүләт имтиханнарына да яхшырак әзерләнергә, чит телләрне үзләштерергә, башка илләрдә яшәүче яшьтәшләрегез белән аралашырга хәзер бөтен мөмкинлекләрегез дә булачак. Заманнан калышмыйча, алдынгы карашлы, илебезнең лаеклы гражданнары булып үсүегезне телим, — диде район җитәкчесе Илшат Нуриев авылдашларын бәйрәм белән котлап һәм уку йортына 50 меңлек сертификат, көрәш келәме бүләк итте.
Белем бәйрәме чәчәккә күмелгән, үзе дә гөл кебек балкып торган мәктәп каршында үтте. Респуб- лика президент программасы буенча мәктәпне яңарту өчен 12,4 млн. сум бирелгән. “Арча МСО”сы ширкәте төзүчеләре узган ел декабрь аенда ук эшкә тотынганнар. Нәтиҗәсе сокланырлык. Район җитәкчесе әйткәнчә, мәктәпләрнең “кабыгы” гына калдырылып, башка бөтен җире яңартылган. Бу быел ныклап төзекләндерелгән 5 мәктәпкә дә кагыла.
Ә менә Апазда моның белән генә чикләнмичә, “Ватан” хуҗалыгы көче белән бик матур капка-койма да ясап куйганнар. Шушы эшләрне башкару өчен хуҗалык 1,5 млн. сум тоткан.
— Көнне төнгә ялгап эшләүче хезмәткәрләребез балалары укыячак мәктәп матур булсын дип тырыштык, — ди хуҗалык җитәкчесе Мансур ага Әхмәтов.
Бу бәйрәмгә дә ул буш кул белән килмәгән, каникулда хуҗалыкка ярдәм иткән укучыларга бүләкләр тапшырды, мәктәп коллективына яңа уку елында уңышлар теләде.
Бүләкләр, котлаулар күп булды бу көнне. Наласа авыл җирлеге башлыгы, шушы мәктәптә белем алган авылдашлары Илфира Шакирова да туган мәктәбенә кыйммәтле бүләген алып килгән, тәб- рикләүләрен дә матур итеп шигырь юлларына салып җиткерде. Андый игелекле, юмарт укучылары шактый икән Апаз мәктәбенең. Мәктәп директоры Раушан Сибагатуллин әйтүенчә, “Үз мәктәбеңә булыш” акциясе кысаларында элеккеге укучылары мәктәпкә 155 мең сумнан артык ярдәм күрсәткәннәр инде. Мәктәпне төзекләндерү программасына кертүгә зур көч куйган легендар якташлары, Россия Дәүләт Думасы депутаты Фатыйх Сибагатуллинга, респуб- лика, район, хуҗалык, авыл җирлеге җитәкчеләренә, төзүчеләргә олы рәхмәтен белдерде ул үз чыгышында.
— Без мондый уку йортында эшләячәк яшь коллегаларыбыздан бераз көнләшәбез дә хәтта, — диде шаяртып, ветеран укытучы Ләлә Фәйзрахманова һәм шушы мәктәптә белем алган дәрәҗәле якташларыбызга тиң булырлык алмаш үсүен теләде.
Мәктәп тыштан гына түгел, эчке яктан да танымаслык булып үзгәргән. Бәйрәмгә килгән кунаклар классларда булып, укучылар, укытучылар белән аралашып, төпле киңәшләрен бирделәр. Илшат Габделфәртович 11 сыйныф укучыларына БДИга хәзердән үк әзерләнә башларга тәкъдим итте.
— Авыл баласы өчен Арча мәктәбенә барып имтихан бирү психологик яктан кыен булганга, моны алдан берничә тапкыр сынау формасында үткәреп карарга кирәк, — диде ул.
Мәгариф идарәсе җитәкчесе Зөлфәт Дәүләтбаев быелгы уку елыннан әлеге алымны тормышка ашырырга ышандырды.
Исрафил Насыйбуллин