Күптән көткән көн

Күптән көткән көн
Бүген табигать тә сөенә, иртәдән кояш мәрхәмәтле нурларын сибә. Урамнар буйлап чәчәк бәйләмнәре тоткан укучылар атлый. Бәйрәм бүген, бәйрәм! Белем көне! Районыбызның кайбер мәктәпләре өчен икеләтә бәйрәм алып килгән көн бу.
Арчаның 3нче номерлы гомуми белем мәктәбе тарихына 2015 елның 1 сентябре алтын хәрефләр белән язылачак көн. Булачак атак-лы рус җырчысы Федор Шаляпин, Татарстанның халык язучылары Мөхәммәт Мәһдиев, Гариф Ахунов исемнәре белән бәйле уку йортының язмышы шактый еллар, кем әйтмешли, күктә асылынып торды. Тузган диварлары ишелеп төшкәч укытучылар, укучылар, ата–аналар күз яшьләре түкте, күпләрнең йөрәк ярасына әверелде. Шушы мәктәптә гомерләре үткән ветеран укытучыларның яңартылган мәһабәт бинаны ачу тантанасында күзләрендә яшь иде, әмма бу юлы инде шатлык яшьләре.
— Безнең барыбыз өчен дә тарихи вакыйга бу, — диде район җитәкчесе Илшат Нуриев тантанада ясаган чыгышында. — Бу мәктәпнең төп юнәлеше татар телен өйрәнү булачак, анда шулай ук рус, инглиз, гарәп телләре дә укытылачак. Без әлеге уку йортына зур өметләр баглыйбыз, барыгызга да сәламәтлек, уңышлар телим!
Татарстан Республикасы Дәүләт Советы депутаты, Бөтендөнья татар конгрессы башкарма комитеты рәисе Ринат Закиров та Арчада татар мәктәбе ачылуга бик шат.
— Без бу көнне күптән көткән идек, — диде ул. — Бөек Тукайны биргән төбәктә татар мәктәбе булырга тиеш!
Ринат Закиров Арчаның бу мәктәбенә Бөтендөнья татар конгрессы башкарма комитеты шефлык итәчәк дип тә ышандырды. Шул ук вакытта биредә һәр бала татар телен белергә тиеш, дигән теләк тә белдерде.
Ветеран укытучы Наилә Миннемуллина яңа мәктәп ачылуга шундый шатланган, ул үзенең хисләрен, рәхмәтен шигырь юллары белән дә җиткерде.
“Арча КСМы” ширкәте җитәкчесе Рафаэль Муллагалиев мәктәп директоры Тимур Сәгъдиевка символик ачкыч тапшырды, уңышлар теләде.
Кызыл тасманы кискәннән соң балалар укытучылар озатуында белем дөньясына юл алды. Хөрмәтле кунаклар мәктәп белән танышып, андагы шартларга югары бәя бирделәр, теләкләрен әйттеләр.
Ильяс Фәттахов