Бүләккә — спорт мәйданчыгы

Бүләккә — спорт мәйданчыгы
Кешегә шатлык өләшү һәркемнең дә кулыннан килеп бетми. Яхшылыкны, шатлыкны шәфкатьле күңел ияләре генә эшләргә сәләтле.
Шөкер, районыбызда андый кешеләр бармак белән генә санарлык түгел. Җитәкчеләр арасында миһербанлы затларның булуы сөендерә. Мәсәлән, “Таттелеком”ның Арчадагы филиалы җитәкчелеге кебек.
Әлеге оешманың игелекле эшләре турында газета битләрендә еш яктыртылып барса да, аларның һәрберсе игътибарга лаек, үзенчәлекле, халык өчен эшләнә торган. Шушы көннәрдә генә Арча ЗУЭСы коллективы савап- лы гамәл кылып, райондагы шактый баланы сөендерде. “Мәктәпкә җыенырга булыш” акциясе кысаларында авыр хәлле гаиләләрдә тәрбияләнүче 10 баланы бәйрәм табыны артына чакырып, аларга бәйрәм оештырып, мәктәп әсбаплары тулы букчалар бүләк итте, 1 сентябрьдә Яңа Кишет, Симетбаш һәм Шушмабаш мәктәпләренә 1 сыйныфка баручы укучыларының һәрберсе шундый букчаларга ия булды. Ә аңарчы, яңа уку елы башланырга 4 көн кала, Акчишмә башлангыч мәктәбенә спорт мәйданчыгы төзеп бүләк итте. Әйткәндә генә ансат сыман, ә ул сүзләр артында никадәр хезмәт ята! Мәйданчыкка түшәргә 10ар тонна сыйдырышлы 20 йөк машинасы ком гына киткән! Коллектив белән бергә кулга–кул тотынып эшләмәсәң, барысына өлгереп тә булмый. Ләкин, нәтиҗәсе нинди куанычлы! Футбол, баскетбол, волейбол кырлары аерым ясалган, һәрберсе тоткарлык полосалары белән чикләнгән, уеннар өчен җайланмалар (сеткалар) белән җиһазланган. Бу мәйданчык мәктәп укучыларына гына түгел, Акчишмәнең спорт яратучы яше–картына хезмәт итәчәк әле. Моңа бигрәк тә яшьләр куаныр. Мәйданчыктан тыш коллектив авыл урамыннан мәктәпкә кадәр илтүче юлга таш та түшәгән, мәктәп коймаларын төзекләндергән. Элек тездән пычрак ерып йөргән балаларга гына түгел, авыл халкына да шатлык булган ул юл. Мәйданчыкны ачу тантанасында Арча ЗУЭСы җитәкчесе Рөстәм Гомәров мәктәпкә 8 пар чаңгы, футбол, волейбол, баскетбол туплары, скакалкалар, кыршаулар да бүләк итте.
Тантаналы ачылыш авылга ямь биреп, җанландырып җибәрде. ЗУЭС һәвәскәрләре һәм укучылар башкаруындагы җыр–моңга күмелгән бәйрәмгә өлкәннәр дә җыелган иде. “Таттелеком”ның матбугат үзәге җитәкчесе шагыйрь Рөстәм Закуанов Акчишмәгә багышлап язган шигырен көйгә салдырып, җыр итеп яздырып бүләккә алып кайткан. Бүгенге бәйрәмдә җыр авыл халкы өчен тәүге тапкыр яңгырады. Киләчәктә акчишмәлеләрнең иң яраткан җырына әверелер ул.
Бәйрәмнең балалар өчен иң күңелле мизгеле — Арча ЗУЭСы хезмәткәрләре тарафыннан оештырылган кызыклы уеннар булды. Уеннарда җиңүчеләргә бүләкләр дә мулдан әзерләнгән иде.
“Мәктәпкә шундый бүләк әзерләүнең төп максаты – балалар сәламәт булып үссен дип тырышу. Урман тирәлегендә утыручы авылда саф һава сулап яшәүче балалар спорт белән шөгыльләнеп сәламәтлекләрен тагын да ныгытачак, — ди Рөстәм Гомәров. — “Таттелеком” компаниясе җитәкчесе Лотфулла Шәфигуллинның бабасы Зариф Сәфәргалиев шушы авылдан чыккан кеше. Акчишмәлеләрне быел көзгә сыйфатлы кәрәзле элемтә белән дә сөендерергә ниятлибез. Кәрәзле элемтә генә түгел, телевидение, Интернет та югары тизлек белән эшләячәк”.
ЗУЭСның спорт мәйданчыгы ясавы юкка түгел. Әлеге коллектив үзе дә спорт белән дус яши. Алар республика күләмендәге ярышларда катнашып, алдынгы урыннар яулыйлар. Спорт белән шөгыльләнү өчен бөтен шартлар тудырылган. Күптән түгел хезмәткәрләре Фоат Фәрхуллин районда ГТО нормалары тапшыру буенча алдынгылыкка чыгып, ял йортына путевка белән бүләкләнде.
Акчишмә мәктәбенә килгәндә, биредә 4 сыйныфта 7 бала укый. Аларга ике укытучы белем бирә. Бәйрәм чарасында Рөстәм Гомәров 7 балага да мәктәп әсбаплары тулы букчалар тапшырды. Ашытбаш мәктәбе директоры Рәмизә Кавиева бу мәктәптән укырга төшкән укучыларның тәртипле, игътибарлы, ихтирамлы булуларын, белемгә тартылулары белән аерылып торуларын билгеләп үтеп һәм шундый балалар тәрбияләгәннәре өчен әти–әниләргә, укытучыларга рәхмәтен җиткереп, “Мин Акчишмә балаларын һәрвакыт үрнәк итеп куям”, — диде.
70 хуҗалыклы Акчишмәгә киләсе елга беренче сыйныфка 3 бала укырга керәчәк. Яшьләрнең шәһәргә китүенә авыл халкы да борчыла.
Шау–гөр килеп уйнаучы балаларның тавышы астында яңа гына язылган җыр яңгырый:
Акчишмәнең изге көмеш суы
Ераклардан безне чакыра...
Их, бәхет эзләп читкә киткән яшьләр дә кире кайтса иде...
Розалия
Зиннәтова