Укытучылар сабантуенда

Укытучылар сабантуенда
Укытучылар өчен кызу урак өсте – яңа уку елы башланды. Быел ул бик матур чара – сабантуй белән старт алды. 31 августта Арча стадионы район мәктәпләре укытучыларын үзенә җыйды.
– Изге ният белән йөрүчеләр икәне күз алдында, күрегез, алар бәйрәм иткәндә яңгырга кадәр туктап торды, – дигән сүзләр ул көнне еш ишетелде.
Стадион капкасын керүгә, кунакларны үзләре чәчәкләр булып киенгән укытучылар каршы алды. Гүя ике яклап тезелеп бас- кан тере чәчәкләр арасыннан үтәсең. Ә аларга балалар бакчалары коллективлары әзерләгән чәчәкләр күргәзмәләре кушылып китә.
– Шундый чәчәкле, матур балачак илендә яшәгән балалар гына бәхетле була. Беренче чиратта шуны күз алдында тоттык, – ди “Шатлык” балалар бакчасы җитәкчесе Надия Мифтахетдинова.
Яңа Кенәр иҗат йорты, Арча сәнгать мәктәбе коллективлары тарафыннан оештырылган кул эшләре күргәзмәләре дә шул бәхетле балачак илендә яшәүчеләр өчен.
Көне салкын булса да, бәйрәмгә килүчеләрнең, йөрәкләре кайнар иде. Шул кайнар йөрәкләр бергә кушылып, бөтен стадионга җылы өрде, котлау сүзләре, бүләкләр күңелләрне җылытты. Район башкарма комитеты җитәкчесе Илшат Нуриев, район мәгариф идарәсе җитәкчесе Зөлфәт Дәүләтбаев педагогларны яңа уку елына аяк басулары белән котладылар, алдынгы укытучыларга бүләкләр тапшырдылар.
“ТАТМЕДИА” акционерлык җәмгыяте район һәм үз кул астында булган республика газета-журналларына иң күп язылган абунәчеләр арасында “Газета-журналларга язылучыларга – айпад” дигән исем астында бәйге игълан иткән иде. Безнең райондашларыбыз да анда катнашты. 17 кеше беренче 50 катнашучы исемлегенә керде һәм истәлек бүләгенә лаек булды. Аларның барысы да бер генә чарадан да читтә калырга тырышмаган укытучылар. Һәм бу көнне үзләренә сәхнәдән әлеге бүләкләр тапшырылды. Гөлфия Фазылҗанова, Зөлфия Хәмидуллина, Миләүшә Зарипова, Гөлгенә Вафина, Лилия Арсаева, Алия Газизова, Лилия Гыйлаҗиева, Вәсилә Сафина, Альбина Мөхәммәтгалиева, Гөлнур Сәлахова, Роза Хәйретдинова, Гөлфирә Зәкиева, Фәния Абдуллина, Гөлгенә Бәдретдинова, Эльфира Гасретдинова, Ләйсән Гозәерова, Гөлнара Хәмидуллинаны җиңүләре белән чын күңелдән котлыйбыз.
– Без беренче чиратта район газетасын алдырабыз. Укытучылар буларак, мәктәп тормышын чагылдырган мәкаләләргә күбрәк игътибар бирәбез, – диделәр алар.
Район һәм республика газета-журналлары киләчәктә дә киңәшчегез һәм дустыгыз булсын. Мондый бәйгеләр киләчәктә дә оештырылачак. Катнашыгыз, җиңегез, тагын да зуррак бүләкләргә лаек булыгыз.
Сабантуй җыр, бию, уеннар белән үрелеп барды. Укытучылар да, укучылар да чыгыш ясады. Уеннарда җиңүчеләр өчен бүләкләре дә яхшы иде. Теләгән кеше шунда ук ГТО нормаларын тапшыра алды.
Ә алгы мәйданда Габдулла Тукайның 130 еллыгы уңаеннан аның иҗатына багышланган бәйге оештырылды. Анда шагыйрьнең шигырьләре, аның сүзләренә язылган җырлар яңгырады.
Укытучылар сабантуен Шәһәр көненә багышланган чара дәвам итте. Үзешчәннәребез чыгыш ясады, уеннар оештырылды. Бүләкләр дә булды.
Шәһәр халкын район башкарма комитеты җитәкчесенең беренче урынбасары Илшат Галимуллин котлады һәм бәйгедә җиңүчеләргә бүләкләр тапшырды.
“Иң яхшы шәхси йорт” номинациясендә Лесная урамы, 16нчы йорт (Ләйлә һәм Илфир Миннебаевлар) җиңде, Маршал Жуков урамы, 7а йорт (йорт буенча җаваплы Фәридә Хәйруллина) күпфатирлы йортлар арасында иң яхшы дип табылды. “Надежда” торак милекчеләр ширкәте (Ибраһим Сабиров) бүләккә лаек булды. Бюджет оешмалары арасында балалар һәм яшүсмерләр спорт мәктәбе (җитәкчесе Ринат Гәрәев), җитештерү предприятиеләре арасында “Энергосервис” ширкәте (Рамил Әхмәтгалиев) иң яхшылар исемлегенә керде. Иң төзек урам дип Космонавтлар урамы (территориаль җәмәгатьчелек үзидарәсе, җитәкчесе Ринат Сафин) танылды. Бәйрәм лазер шоу белән тулыландырылды. Соңыннан салют белән тәмамланды.
Гөлсинә Зәкиева