Атлар чаба

Атлар чаба
Шәһәр көне уңаеннан Арча ипподромында ат чабышы да булды. Анда атлар да күп катнашты. Питрәч, Саба, Балтач, Биектау районнарыннан, Киров өлкәсеннән (Малмыждан) дә җайдаклар килгән иде. Ярышны эш атлары башлап җибәрде.
15 ат икегә бүленеп чабышка китте. Финалга беренче өч урынны алганнар чыкты. Алар арасында беренче урынны Кәчедән “Альзат” кушаматлы аты белән Рәсим Әсәдуллин яулады. Икенче урында “Мәрҗани” ширкәтеннән Владимир Квасов (“Премулла” кушаматлы аты белән), өченче – Күпербаштан Ильвир Шәрифуллин (“Прелесть” кушаматлы аты белән). Район җитәкчесе иң соңгы килгән Илназ Сәләхетдиновка (Шушмабаштан) велосипед бүләк итте.
Алардан соң чабышка 2 яшьлек атлар чыкты. Монда беренче урынны Малмыждан Адель Габидуллин алды. “Мәрҗани” ширкәтеннән Анна Макарова финишка икенче булып килде. Иске Чүриледән Рөстәм Зарипов өченче булды.
Ярым чиста токымлы атлар арасында беренче урынны “Хитрый” кушаматлы аты белән Иске Иябаштан Илназ Шакирҗанов алды. Илназ иң яшь җайдак буларак та район җитәкчесе кулыннан истәлек бүләге алды. Ул әле быел дүртенче сыйныфка гына бара. Әтисе Илшат, әнисе Илсөя, апасы Гүзәл җанатарлары булып килгән.
– Илназ 6 яшьтән бирле атта йөри, – ди әтисе, улы җиңүе өчен сөенечен яшермичә. – Авыллар Сабантуйларында 2-3нче урыннарны ала иде. Ә бу юлы менә беренче килде.
Арчадан Рамил Рәхмәтуллин – икенче, Айваннан Исмәгыйль Яхин өченче булды. Аларның инде бу беренче ярышлары гына да, җиңүләре генә дә түгел. Исмәгыйль Яхинны бу көнне иң өлкән җайдак буларак та бүләк белән билгеләп үттеләр.
Чиста токымлы атларны карап торуы ук күңелле. Матурлар, уйнаклап кына торалар. Чабышта да осталар. Шундый 10 ат килгән иде. Беренче урынны Арчадан Салават Бикбаев яулады. Салават 9 яшьтән бирле бер генә ат чабышын да калдырмый, Сабантуйларда җиңүләр яулый.
– Быел Теләчедә, Саба районында – беренче, Кукмарада икенче килдем. Алары икенче ат белән. Ул атны миннән Илназ Шакирҗанов сатып алды һәм бүген беренче булып килде. “Шумный бор” кушаматлы 3 яшьлек бу ат белән беренче ярышым һәм җиңүем, – ди Салават Бикбаев.
Икенче урында Биектау районыннан килгән җайдак Александр Кумлев, өченче урында “Кырлай” агрофирмасы” ширкәтеннән Радик Гарифуллин.
Соңыннан Илшат Нуриев җиңүчеләргә бүләкләр тапшыр-ды.
Гөлсинә Зәкиева