Әмир ни әйтергә теләгән

Әмир ни әйтергә теләгән
“Президент белән бергә” иҗтимагый хәрәкәте “Казан-Арена”стадионында балалар открыткалары эскизлары конкурсы җиңүчеләрен котлады. Ул Республика көненә багышлап үткәрелде.
“Безнең Республика: Без булдырабыз! Без бергә!” Республика көне белән!” – әнә шушы өндәмәләр, котлаулар открыткаларда чагылыш тапты. Конкурс- та җиңүчеләр арасында безнең районнан да бер бала бар. Ул Наласа урта мәктәбенең 2нче сыйныф укучы Әмир Төхфәтуллин. Әмир Казаннан Дип- лом һәм республика символикасы төшерелгән бүләкләр белән кайтты.
“Президент белән бергә” иҗтимагый хәрәкәте быел апрельдә республика күләмендә үткәрелгән “Без булдырабыз! Без бергә!” форумында барлыкка килде. Анда Татарстанның барлык иҗтимагый оешмалары вәкилләре катнашты. Безнең районнан да делегатлар бар иде. Форумның максаты президент программаларына һәм инициативаларына теләктәшлек белдерү максатыннан татарстанлыларны берләштерү һәм гамәлләрне тормышка ашыру иде. Делегатлар форумнан кызыклы кешеләр белән очрашып, секцияләрдә катнашып, яңа идеяләр белән канатланып кайтты. Әлеге хәрәкәт активистларын районның массакүләм чараларында гел күреп торабыз. Алар Арчаның үзәк мәйданында үткәрелгән флэшмобта (анда 300ләп кеше биеде), яшьләр өчен “Җомга” кафесын эшләүдә, зур чаралар үткәрелгән вакытта “Спорт сөюче Татарстан” дигән тематик мәйданчыкта ГТО нормаларын тапшыруны оештыруда, “Республика тасмасы” акциясендә, “Геройлар урамнары” проектын тормышка ашыруда һ.б.да актив катнашты һәм катнаша.
Балалар открыткалары эскизлары конкурсында җиңгән Әмир Төхфәтуллинның әнисе Миләүшә ханым:
– Әмир открытканы заманча ысул белән эшләде, – дип сөйләде. – Безнең Наласа мәктәбендә “Оста куллар” дәресендә Миләүшә Сабирҗанова балаларга кызыклы ысуллар белән төрле сүрәтләр, ваза, чәчәкләр һ.б. шундый нәрсәләр эшләргә өйрәтә. Эшләнмәләр бик матур килеп чыга. Узган ел кызыбыз Зөлфинә яшьтәшләре арасында җиңеп чыкты.
“Оста куллар” дәресен алып барган Миләүшә Сабирҗанова:
–Сырлы кәгазьләрне ваклап кисәсең дә, шул шакмакларны авторучка яки паста очына алып келәй белән урта бер җиреннән рәттән ябыштыра барасың, – дип аңлатты бу ысулны. – Бик вак, вакытны ала торган эш, әмма мавыктыргыч.
– Башта кызыл төстәге йөрәкне ясадым, – дип сөйли Әмир. – Аның кырыйларын яшел төс белән каймалап алдым. Аннан лалә чәчәкләре ясадым. Әти-әнине Республика көне белән котлап, текст яздым. Йөрәк сурәте ул әти-әниеңне, туган җиреңне, республикаңны ярату билгесе, яшел төс безнең милли төсебез, лалә чәчәкләре шулай ук милли бизәгебез.
– Идеясен бергәләп уйлаштык. Республика көненә багышланган әлеге открытка якыннарны котлап эшләнергә тиеш иде, – дип сүзне дәвам итте әнисе Миләүшә ханым. – Монда әти-әни, туган җир, республика аерылгысыз. Мәхәббәт, дуслык, бергәлек – менә кайда көч! Безнең Республика: Без булдырабыз! Без бергә! Республика көне белән!
Румия Надршина