Мәктәпләр ярминкәсе гөрләде

Мәктәпләр ярминкәсе гөрләде
Мәктәпләр ярминкәсен ел да Арча халкы түземсезлек белән көтеп ала. Шулай булмый, ул көнне җаның ни тели, шуны – яшелчәсен, җиләк-җимешен, пешкән әйберләрен, кайнатмасын һәм башка кирәк-яракларны юнәтергә була.
Һәм арзан бәядән. Өстән яңгыр сибәләп торуга карамастан, халык быел да күп килгән иде. Төне буе саклап торганнармыни, иртәнге җидедә ярминкә гөрли иде инде. Өстәлләр товардан сыгылып тора. Кибетче урынында – укытучылар үзләре. Якты чырай белән каршы алалар, товарларын мактыйлар. Кирәкмәсә дә алырсың. Мәктәп директорлары да шул тирәдә кайнаша, шунда ук сатучы укытучыларга ярдәмгә килә.
– 70тән артык товарыбыз бар, – диләр Иске Ашыт мәктәбенең укыту һәм тәрбия эшләре буенча директор урынбасарлары Гөлфирә Галиева, Нурия Гарипова, биология укытучысы Әминә Әхмәтгалие- ва, физкультура укытучысы Габделфәрих Сәлахов. – Бәрәңге, кишер, суган, чөгендер, баллы борыч, сарымсак һәм башкалар – бар да мәктәп бакчасында үскән.
Ашытбаш мәктәбе укытучылары Гөлүсә Гыйззәтуллина, Рәсимә Зәкиева, Әлфия Әхмәтгалиеваның да сату әйбәт бара.
– Кишер, чөгендер, суган уңышы бик яхшы булды. Аларны бик тиз алып та бетерделәр. Яшелчә орлыклары, тәмләткечләр дә бик әйбәт сатылды, – ди мәктәп директоры Рәмизә Кавиева.
Укытучылар төне буе йокламаган күрәсең, әле күптән түгел генә мичтән чыккан чәй ризыклары да күп иде сатуда.
Ассортимент күп булсын өчен өйдән дә әйберләр алып килгәннәр. Йомырка, эремчек, сөт, умарта балы – әнә шундыйлардан. Яңа Кырлай мәктәбе укытучысы Эльмира Әхмәтгалиева алып килгән шундый продуктлар бик яхшы сатыла.
Апаз мәктәбе чәй өстәле әзерләгән. Самоварда кайнаган чәй янында әле яңа табадан төшкән коймагы да бар. Күңелләре киң кызларның, берәүне дә сыйламый җибәрмиләр.
5нче гимназия биләмәсе яныннан да кеше өзелеп тормый. Әлфия Сабирова чиккән түбәтәйләр берәүне дә игътибарсыз калдырмый. Гөлүсә Вәлиуллина үстергән чәчәкләргә, үсентеләр, әле дә пешеп утырган эре-эре җиләкләргә, карлыган куакларына кем генә битараф калыр икән.
Исемнәрен телгә алмаганга үпкәләмәсләр, дип уйлыйм, һәр мәктәп коллективы мактауга лаек, ярминкәгә көченнән килгәнен дә, килмәгәнен дә кушып, бик яхшы әзерләнгән. Сату да яхшы барды, шунда ук сәхнәдән укытучылар һәм укучылар җыр-бию белән халыкның күңелен күрергә дә өлгерделәр.
Гөлсинә Зиннәтова